கொழும்பு துறைமுக நகர் திட்டத்திற்கு எதிராக மனு தாக்கல்

கொழும்பு துறைமுக நகர திட்டத்துக்கு எதிராக மற்றொரு அடிப்படை உரிமைகள் மனுவொன்று தாக்கல் செய்யப்பட்டுள்ளது.
இது தொடர்பில் அகில இலங்கை மீனவ சமூக தொழிற்சங்கம் ஒன்று, நேற்று உச்ச நீதிமன்றத்தில் அடிப்படை உரிமை மீறல் மனுவை தாக்கல் செய்துள்ளது.

கொழும்பு துறைமுக நகர நிர்மாணிப்புக்காக எந்தவித சாத்தியக் கூற்றறிக்கையையும் கவனத்தில் கொள்ளாது துறைமுக நகரத் திட்டத்துக்காக அரசுக்குரிய காணி வழங்கப்பட்டுள்ளது.

இதன் மூலம் தமது அடிப்படை உரிமை மீறப்பட்டுள்ளதாக மனுவில் குறிப்பிடப்பட்டுள்ளது.

சங்கத்தின் தலைவர் அருண ரொஷாந்த பர்னாண்டோ தாக்கல் செய்த மனுவில் பிரதிவாதிகளாக சட்டமா அதிபர், துறைமுக அதிகார சபை, கரையோர பாதுகாப்பு திணைக்களம், கொழும்பு மாநகரசபை, வீதிஅபிவிருத்தி அதிகார சபை, சைனா, கொமினிகேஷன் கன்ஸ்ட்ரக்ஷன் நிறுவனம் என்பன குறிப்பிட்டுள்ளன.

துறைமுக நகரில் 20 ஏக்கர் நிலப்பரப்பொன்றை உருவாக்குவதற்காக நிர்மாணப் பணிகளில் ஈடுபட்டுள்ள சீன நிறுவனத்துக்கு எந்தவித கேள்வியும் இன்றி வழங்கப்பட்டுள்ளது என்றும் துறைமுக நகரத்துக்காக ஒதுக்கப்பட்ட பகுதியை நிரப்பும் போது கொழும்பு மற்றும் நீர்கொழும்பு வரையிலான கரையோரப் பகுதிகளில் கடற்றொழிலில் ஈடுபட்டு வரும் சுமார் 30,000 குடும்பங்களின் வாழ்வாதாரம் முற்றாகப் பாதிக்கப்படுவதாக மனுவில் சுட்டிக்காட்டப்பட்டுள்ளது.