கண் விழித்தபோது ஆங்காங்கே தொங்கி கொண்டிருந்த சடலங்கள்: ஓசூர் ரயில் சம்பவம்

ஓசூர் ரயில் விபத்தில் சிக்கிய பயணிகளை மீட்க பொலிசாரும், மீட்புகுழுவினரும் 2 மணி நேரம் கழித்தே வந்தனர் என்று விபத்தில் சிக்கிய பயணிகள் குற்றம் சாட்டியுள்ளனர்.
பெங்களூரில் இருந்து கோயம்புத்தூர் வழியாக எர்ணாகுளம் வரையில் செல்கின்ற இன்டர்சிட்டி விரைவு ரயில் ஓசூரில் இருந்து 4 கிலோ மீற்றர் தொலைவில் உள்ள ஆனைக்கல் என்ற இடத்தில் தடம் புரண்டு விபத்துக்குள்ளானது.

இதில் 12 பேர் பலியாகினர், 60 பேர் காயமடைந்தனர்.

இந்த விபத்த குறித்து அந்த ரயிலில் பயணம் செய்த ரோஷினி என்ற பெண் கூறுகையில், தூங்கிக்கொண்டிருந்த நான், கண் திறந்தபோது டி9 பெட்டி முழுவதும் புகை மண்டலம்.
புகைப்படலம் விலகியபோது ஆங்காங்கே சடலங்கள் தொங்கிக் கொண்டிருந்ததை பார்த்தேன், மக்கள் ஆங்காங்கே தொங்கிக் கொண்டிருந்தனர்.

ஒரு சிறுவன் தலை நசுங்கி இறந்து கிடந்தான. ஒரு பெண் தலைகீழாக தொங்கிக் கொண்டிருந்தார்.

விபத்து காலை 7.35 மணியளவில் நடந்திருக்கிறது. ஆனால், காலை 9 மணி வரை சம்பவ இடத்துக்கு பொலிஸ் அதிகாரிகளோ, மீட்புக் குழுவினரோ வரவில்லை.

ஒன்றரை மணி நேரமாக சக பயணிகள் சிலர் உதவியாலும், அப்பகுதி மக்கள் உதவியாலுமே பயணிகள் சிலர் மீட்கப்பட்டனர் என ரோஷினி கூறியுள்ளார்.