வடமராட்சியில் பொலிஸாரின் துப்பாக்கிச் சூட்டுக்கு இலக்காகி ஒருவர் படு காயம்

வடமராட்சி வல்லிபுரம் பகுதியில் சட்டவிரோதமாக மண் அகழ்வில் ஈடுபட்ட 15 பேரை பொலிஸார் தடுக்கச் சென்ற வேளை பொலிஸாருக்கும் மண் அகழ்வில் ஈடுபட்டோருக்கும் இடையில் தாக்குதல் நடந்ததில் பொலிஸாரின் துப்பாக்கிச் சூட்டுக்கு இலக்காகி ஒருவர் காயமடைந்துள்ளார்.

இச் சம்பவம் பற்றி மேலும் தெரிய வருவதாவது, வல்லிபுரம் பகுதியில் 15 பேர் கொண்ட கும்பல் ஒன்று மண் அகழும் முயற்சியில் ஈடுபட்டுக் கொண்டிருந்த வேளை அதனை தடுப்பதற்கு பொலிஸார் சென்றனர். அந்த வேளையில் பொலிஸார் மீது அக் கும்பல் தாக்குதல் நடாத்தியது. இதனால் பொலிஸார் வானை நோக்கி துப்பாகிப் பிரயோகம் மேற்கொண்டனர். அதனை பறிக்க ஒருவர் சென்ற வேளை தவறுதலாக வெடித்ததில் அவர் படுகாயமடைந்துள்ளார் என காங்கேசன் துறைப் பொலிஸார் தெரிவித்தனர்.

இந்தச் சம்பவத்தில் படுகாயமடைந்த துன்னாலையைச் சேர்ந்த தயாளசிங்கம் தர்சன் என்பவர் பருத்தித்துறை ஆதார வைத்தியசாலையில் சேர்க்கப்பட்டு மேலதிக சிகிச்சைக்காக யாழ். போதனா வைத்தியசாலைக்கு அனுப்பிவைக்கப்பட்டார்.

இந்தச் சம்பவத்தில் காயமடைந்த இரு பொலிஸாரும் யாழ். போதனா வைத்தியசாலையில் சேர்க்கப்பட்டுள்ளதாக பொலிஸார் குறிப்பிட்டுள்ளனர்.