இலங்கையின் அபிவிருத்திக்கு அமெரிக்கா உதவும்!- அமைச்சர் சஜித் பிரேமதாச

அமெரிக்காவின் உதவியுடன் நாட்டின் அபிவிருத்தி மேலும் வேகமடையும் என வீடமைப்பு மற்றும் நிர்மாணத்துறை அமைச்சர் சஜித் பிரேமதாச தெரிவித்துள்ளார்.
திஸ்ஸமஹாராம போகஹாபெலஸ்ஸ பிரதேசத்தில் நடைபெற்ற பொதுக் கூட்டம் ஒன்றில் பேசும் போதே அவர் இதனை கூறியுள்ளார்.

அமெரிக்கா நாட்டுக்கு தேவையான உதவிகளை வழங்க தயாராக உள்ளது. இதன் மூலம் நல்லாட்சி அரசாங்கம் நாட்டின் அபிவிருத்தியை மேலும் துரிதப்படுத்தும்.

நாட்டின் அபிவிருத்திக்கு உதவிகளை வழங்க அமெரிக்க தீர்மானித்துள்ளது. அமெரிக்கா உட்பட உலகில் பலமிக்க நாடுகள் எமக்கு உதவிகளை வழங்கி வருகின்றன.

முன்னைய அரசாங்கம் ருவாண்டா, புருண்டி, சோமாலியா, உகண்டா, சிம்பாப்வே போன்ற நாடுகளுடனேயே தொடர்புகளை கொண்டிருந்தது. இந்த நாடுகளிடம் இருந்து எமக்கு முக்கியமான பிரயோசனங்களை பெற்றுக்கொள்ள முடியாது.

சுமார் 60 மனைவிகளை கொண்டுள்ள சுவாசிலாந்து மன்னர் எமது நாட்டுக்கு வந்தார். இப்படியான நாடுகளையே ராஜபக்ச அரசாங்கம் தம்முடன் நெருக்கமாக வைத்திருந்தது.

நாட்டின் வீடமைப்பு துறையில் பாரிய அபிவிருத்தியை எனது அமைச்சின் மூலம் முன்னெடுக்க நடவடிக்கை எடுக்கப்படும்.