ஜனாதிபதியின் பதவிக்கால தவணை நான்கு வருடங்களுக்கு மட்டுப்படுத்தப்படும்! வவுனியாவில் மைத்திரி

ஜனாதிபதி பதவியின் தவணைக்காலம் நான்கு வருடங்களுக்கு மட்டுப்படுத்தப்படும் என்று பொது வேட்பாளர் மைத்திரிபால சிறிசேன வவுனியாவில் தெரிவித்துள்ளார். வவுனியாவில் இடம்பெற்ற பிரச்சாரக் கூட்டத்தில் கலந்து கொண்டு உரையாற்றும்போதே அவர் மேற்கண்டவாறு தெரிவித்துள்ளார்.

அங்கு தொடர்ந்தும் உரையாற்றிய மைத்திரிபால, தற்போதைய நிலையில் அபிவிருத்தி என்ற மாயையில் ராஜபக்ஷ குடும்பத்தினர் மட்டுமே அபிவிருத்தி அடைந்துள்ளார்கள். இந்த நிலை மாற்றியமைக்கப்படும்.

நாட்டின் அனைத்து மக்களும் தங்களது உரிமைகளைப் பெற்றுக் கொள்ளும் வகையிலும், சுதந்திரக் காற்றை சுவாசிக்கும் வகையிலும் ஜனநாயம் மீளக் கட்டியெழுப்பப்படும்.

அனைத்து மதங்களைச் சேர்ந்த மக்களுக்கும் அவரவர் மத வழிபாட்டிற்கான சுதந்திரம் மற்றும் அதற்கான பாதுகாப்பு உறுதிப்படுத்தப்படும்.

அத்துடன் ஜனாதிபதியின் ஒரு தவணைக்காலம் நான்கு வருடங்களுக்கு மட்டுப்படுத்தப்படும். இதன் மூலம் அதிகார வெறியில் ஊழல், மோசடிகளை மேற்கொள்வது தடுக்கப்படுவதற்கான வழி ஏற்படும் என்றும் மைத்திரிபால சிறிசேன தொடர்ந்தும் தெரிவித்துள்ளார்.