பள்ளி லிஃப்டில் தலை சிக்கி 3 வயது மாணவி பரிதாப பலி: பெற்றோர்கள் போராட்டம்

ஹைதராபாத்தில் பள்ளி ஒன்றில் உள்ள லிஃப்டில் 3 வயது மாணவியின் தலை சிக்கியதால் அந்த மாணவி பரிதாபமாக உயிரிழந்துள்ளார்.
ஹைதராபாத் தில்சுக் நகர் பகுதியில் உள்ள ஸ்ரீ சைதன்யா பள்ளியில் சயீதா ஜெயினப் என்ற 3 வயது மாணவி படித்து வந்துள்ளார்.

இன்று காலை பள்ளிக்கு சென்ற சயீதா ஜெயினப், தரை தளத்தில் இருந்து 3வது தளத்திற்கு பிற மாணவ, மாணவியருடன் லிஃப்டில் சென்றுள்ளார்.

அப்போது அவரது தலை லிஃப்டின் கதவில் சிக்கியுள்ளது. லிஃப்ட் மேலே செல்லத் துவங்கியதால் அந்த பச்சிளம் சிறுமி பரிதாபமாக பலியாகியுள்ளார். இதை பார்த்த பிற மாணவ, மாணவியர் அதிர்ச்சி அடைந்துள்ளனர்.

இது பற்றி தகவல் அறிந்த சயீதாவின் பெற்றோர் மற்றும் உள்ளூர் மக்கள் பள்ளிக்கு முன் திரண்டு பள்ளிக்கு எதிராக நடவடிக்கை எடுக்கக் கோரி போராட்டம் நடத்தியுள்ளனர்.

தற்போது இந்த சம்பவம் குறித்து பொலிசார் வழக்குப்பதிவு செய்து தீவிர விசாரணை நடத்தி வருகின்றனர்.