மும்பை விமான நிலையத்தில் தாவூத் இப்ராகிமின் நெருங்கிய கூட்டாளி கைது

மும்பை சர்வதேச விமான நிலையத்தில் தாவூத் இப்ராகிமின் நெருங்கிய கூட்டாளி கைது செய்யப்பட்டுள்ளார்.
நிழல் உலக தாதா தாவூத் இப்ராகிமின் நெருங்கிய கூட்டாளி ரியாஸ் பாத்தி மீது நில அபகரிப்பு உள்பட பல்வேறு குற்ற வழக்குகள் நிலுவையில் உள்ளன.

இந்நிலையில் ரியாஸ் பாத்தி மும்பை சர்வதேச விமான நிலையத்திற்கு வர உள்ளதாக ரகசிய தகவல் கிடைத்துள்ளது.

இதையடுத்து விமானநிலையத்துக்கு விரைந்த புலனாய்வு அதிகாரிகள், ஜோகனஸ்பர்க் செல்வதற்காக விமான நிலையம் வந்த ரியாஸ் பாத்தியை கைது செய்துள்ளனர்.

அவரிடம் இருந்து 2 போலி பாஸ்போர்ட்டுகள் பறிமுதல் செய்யப்பட்டுள்ளன.

இந்த பாஸ்போர்ட்டுகளை கடந்த 2007 மற்றும் 2013-ம் ஆண்டுகளில் ஜெய்ப்பூரில் இருந்து பெற்றது தெரியவந்துள்ளது.

பின்னர் நீதிமன்றத்தில் ஆஜர்படுத்தப்பட்ட ரியாஸ் பாத்தியை, வரும் 2ம் திகதி வரை காவலில் வைத்து விசாரிக்க நீதிமன்றம் அனுமதி அளித்துள்ளது.