மோடியை கிண்டலடித்து ’டப்ஸ்மாஷ்’ வீடியோ வெளியிட்ட லல்லு பிரசாத் யாதவ்

ராஷ்டரிய ஜனதா தளம் கட்சி தலைவர் லல்லு பிரசாத் யாதவ், பிரதமர் மோடியை கிண்டல் அடித்து வெளியிட்டுள்ள வீடியோ பல லட்சம் பேரால் பார்க்கப்பட்டுள்ளது.
கடந்த பாராளுமன்ற தேர்தல் கூட்டங்களில் பங்கேற்ற நரேந்திர மோடி, மத்தியில் தேசிய ஜனநாயக கூட்டணி ஆட்சியில் அமர்ந்தால் ஏழைகளுக்கு நல்ல நாள் (அச்சே தின்) பிறக்கும் என்று வாக்குறுதி அளித்திருந்தார்.

மேலும், வெளிநாட்டு வங்கிகளில் இந்தியர்கள் பதுக்கி வைத்திருக்கும் பல லட்சம் கோடி ரூபாய் கருப்புப் பணத்தை நூறே நாட்களுக்குள் மீட்டு, ஒவ்வொரு இந்தியரின் வங்கிக் கணக்கிலும் 15 முதல் 20 லட்சம் வரை போடப்படும் எனவும் பேசினார்.

தற்போது, பீகார் சட்டசபை தேர்தல் பிரசாரம் சூடுபிடித்துள்ள நிலையில் பிரதமர் மோடியின் பழைய வாக்குறுதிகளை நினைவுப்படுத்தி, லல்லு பிரசாத் யாதவ் வீடியோ ஒன்றை வெளியிட்டுள்ளார்.

இந்த டப்ஸ்மாஷ் வைரலாக பரவி வருகின்றது. ராஷ்டரிய ஜனதா தளம் கட்சியின் சார்பில் பதிவேற்றம் செய்யப்பட்ட வீடியோவை இதுவரை சுமார் 3 லட்சம் பேர் பார்த்துள்ளனர்.