சிறையில் இருந்தபடியே பேஸ்புக்கில் போட்டோ வெளியிட்ட கைதிகள்: பொலிஸ் திணறல்

பஞ்சாப்பை சேர்ந்த சிறைக் கைதிகள் சிலர், சிறையில் இருந்தபடியே பேஸ்புக்கில் தங்கள் புகைப் படத்தை வெளியிட்டு பொலிசாரை திணறடித்துள்ளனர்.
பஞ்சாப் மாநிலத்தில், பொலிசார் மீது துப்பாக்கியால் சுட்ட குற்றத்திற்காக குல்பர் சிங் மற்றும் அவனது கூட்டாளிகள் பாதின்டா மத்திய சிறையில் அடைக்கப்பட்டுள்ளனர்.

இந்நிலையில், அவர்கள் சிறையில் இருந்தபடியே இணைய இணைப்புள்ள கைப்பேசிகளை பயன்படுத்தி தங்கள் புகைப்படத்தை பேஸ்புக்கில் வெளியிட்டுள்ளனர்.

இதுபற்றி அச்சிறையின் துணை கண்காணிப்பாளர் மான்ஜித் சிங் கூறுகையில், இந்த தகவல் தெரிந்தவுடன் அவர்கள் அனைவரும் வெவ்வேறு அறைகளுக்கு மாற்றப்பட்டுள்ளனர்.

அவர்கள் சிறையில் பயன்படுத்திய கைப்பேசிகளை கண்டுபிடிக்க தேடுதல் வேட்டை நடந்து வருகிறது என்றும் விரைவில் கண்டுபிடித்துவிடுவோம் எனவும் தெரிவித்துள்ளார்.

மேலும், இவ்வாறு சிறையில் இருந்தபடியே பஞ்சாப் கைதிகள் பேஸ்புக்கை பயன்படுத்துவது இது முதல்முறை இல்லை என்றும் தகவல்கள் வெளியாகியுள்ளது.