மாட்டிறைச்சிக்காக கொலை: சொந்த கிராமத்தை விட்டு வெளியேறிய குடும்பம்

by oviya Thu Oct 08, 2015 2:23 pm

உத்தரப்பிரதேசத்தில் மாட்டிறைச்சி சாப்பிட்டதாக அடித்துக் கொல்லப்பட்ட இக்லாக்கின் குடும்பத்தினர் பாதுகாப்பு கருதி டெல்லி நகருக்கு குடிபெயர்ந்துள்ளனர்.
உபி.யில் கடந்த மாதம் 28-ம் திகதி கவுதம புத்தர் மாவட்டம் தாத்ரியை அடுத்துள்ள பிசோதா கிராமத்தில், மாட்டிறைச்சி வைத்திருந்தாக முகமது இக்லாக் (58) அடித்து கொலை செய்யப்பட்டார்.

இதனைத் தொடர்ந்து தாத்ரியில் பதற்றம் ஏற்பட்டதால், பாதுகாப்பு கருதி பொலிஸார் குவிக்கப்பட்டனர்.

அது முதல் தாத்ரி சுற்று வட்டாரத்தில் தொடர்ந்து பதற்றம் நிலவுகிறது.

உ.பி. முதல்வர் அகிலேஷ் யாதவ் உள்ளிட்ட கட்சி பிரமுகர்கள், தாத்ரி கிராமத்துக்கு சென்று உயிரிழந்த முதியவரின் குடும்பத்தை சந்தித்து ஆறுதல் அளித்து வந்தனர்.

இந்நிலையில், இக்லாக்கின் குடும்பத்தினர் பாதுகாப்பு கருதி டெல்லிக்கு இடம் பெயர்ந்தனர்.

இத்தகவலை இக்லாக்கின் மூத்த மகன் முகமது சர்தாஜ் உறுதி செய்துள்ளார். அவர் இந்திய விமானப்படையில் பணியாற்றி வருகிறார் என்பது குறிப்பிடத்தக்கது.