சாவுக்கு யார் காரணம்? தற்கொலை செய்து கொண்ட விஷ்ணுபிரியாவின் கடைசி கடிதத்தில் பரபரப்பு தகவல்கள்

தமிழகத்தில் டிஎஸ்பியாக பதவியேற்று ஏழே மாதத்தில் தற்கொலை செய்து கொண்ட விஷ்ணுபிரியா எழுதிய கடிதம் சிக்கியுள்ளது.
திருச்செங்கோடு காவல் துணைக் கண்காணிப்பாளராக பணியாற்றியவர் ஆர்.விஷ்ணுபிரியா(27), திருமணமாகாதவர்.

இவரது தந்தை ரவி, கடலூரைச் சேர்ந்த விஷ்ணுபிரியா பி.எஸ்சி. கணிதத்தில் பட்டம் பெற்றவர்.

சென்னை தலைமைச் செயலகத்தில் வருவாய்த் துறையில் பணிபுரிந்து வந்த இவர், கடந்த 2014-ம் ஆண்டு டிஎன்பிஎஸ்சி குரூப் 1 தேர்வில் தேர்ச்சி பெற்று, சிவகங்கையில் பயிற்சி முடித்து கடந்த பிப்ரவரி மாதம், 1-ஆம் திகதி திருச்செங்கோடு காவல் துணைக் கண்காணிப்பாளராகப் பொறுப்பேற்றார்.

இந்நிலையில், திருச்செங்கோடு டிஎஸ்பி முகாம் அலுவலகத்தில் நேற்று மாலை தூக்கில் தொங்கிய நிலையில் சடலமாக மீட்கப்பட்டார்.

தகவலறிந்த சேலம் சரக டிஐஜி வித்யா குல்கர்னி, நாமக்கல் எஸ்.பி. எஸ்.ஆர்.செந்தில்குமார் ஆகியோர் நேரில் சென்று விசாரணை நடத்தினர்.

அப்போது அங்கிருந்து ஆங்கிலத்தில் 10 பக்கங்களுக்கு விஷ்ணுபிரியா எழுதிய கடிதம் ஒன்று கைப்பற்றப்பட்டது.

அதில், என் சாவுக்கு யாரும் காரணமில்லை. கோகுல்ராஜ் கொலை வழக்கு விசாரணைக்கும், எனது இந்த முடிவுக்கும் தொடர்புபடுத்த வேண்டாம்.

எனது இறப்பை அரசியலாக்கிவிட வேண்டாம், காவல் துறை பணியை தெய்வத்துக்கு இணையாகக் கருதினேன், ஆனால் எனக்குதான் தகுதியில்லை.

பணியால் ஏற்படும் மன உளைச்சலை என்னால் தாங்க முடியவில்லை, என் உடலை உடல்கூறு பரிசோதனை செய்யாமல் பெற்றோரிடம் கொடுத்துவிடவும் என்று எழுதப்பட்டிருந்ததாக பொலிஸ் தரப்பில் தெரிவிக்கப்பட்டுள்ளது.

மேலதிகாரி காரணமா?

இந்நிலையில் இவரது மரணத்திற்கு உயரதிகாரி தான் காரணம் என தகவல்கள் வெளியாகியுள்ளது.

சக அதிகாரிகள் முன்னாலேயே மன உளைச்சல் ஏற்படும் வகையில் அந்த அதிகாரி பேசுவாராம். இதுகுறித்து சக அதிகாரிகளிடம் தெரிவித்து விஷ்ணுபிரியா வேதனைப்பட்டுள்ளார்.

நேற்று திருச்செங்கோட்டில் மாணவர்கள், ஆசிரியர்கள் மறியல் போராட்டம் நடத்தினர். அவர்களை சமாதானப்படுத்தி விட்டு, சாப்பிட சென்ற போது உயரதிகாரி ஒருவர் செல்போனில் பேசியுள்ளார். அதன்பிறகே அவர் தற்கொலை செய்துள்ளதாக பொலிஸ் வட்டாரத்தில் கூறப்படுகிறது.

அவரது செல்போன் நம்பருக்கு கடைசியாக பேசிய அதிகாரி யார்? என்பது குறித்தும் விசாரணை நடத்தி வருகின்றனர்.

மேலும் விஷ்ணுபிரியாவுக்கு அவரது பெற்றோர் வரன் பார்த்து வந்ததாகவும், தனக்கு திருமணம் வேண்டாம் என விஷ்ணுபிரியா கூறி வந்ததாகவும் தெரிகிறது.

இதனால் ஏதேனும் பிரச்னை ஏற்பட்டு தற்கொலை செய்திருக்கலாம் என்ற கோணத்திலும் விசாரணை நடத்தி வருகின்றனர்.