சுங்க அலுவலகத்தில் 23½ கிலோ தங்கம் மாயம்: டெல்லி விமான நிலையத்தில் பரபரப்பு

by oviya Thu Sep 17, 2015 1:30 pm

டெல்லி விமான நிலையத்தில் உள்ள சுங்க அலுவலகத்தில் பாதுகாக்கப்பட்ட 23½ கிலோ தங்கம் மாயமாகி விட்டதாக தகவல் வெளியாகி உள்ளது.
டெல்லி இந்திரா காந்தி சர்வதேச விமானநிலையத்தில், வெளிநாட்டில் இருந்து வரும் பயணிகளிடம் இருந்து

சட்ட விரோதமாக கடத்தி கொண்டு வரப்படும் தங்க கட்டிகள் மற்றும் தங்க நகைகளை சுங்க இலாகா அதிகாரிகள் பறிமுதல் செய்வது வழக்கம்.

பறிமுதல் செய்யப்படும் தங்கம் விமான நிலையத்தில் உள்ள சுங்க அலுவலகத்தின் பாதுகாப்பு பெட்டகத்தில் வைக்கப்படுவதால் அந்த அலுவலகத்துக்கு எப்போதும் பலத்த பாதுகாப்பு வழங்கப்பட்டிருக்கும்.

இந்நிலையில், அந்த அலுவலகத்தில் வைக்கப்பட்டிருந்த 23.6 கிலோ தங்கம் மாயமாகியிருப்பது தெரிய வந்துள்ளது.

மாயமான அந்த தங்கத்தின் மதிப்பு ரூ.6 கோடிக்கும் அதிகமெனவும், இதுகுறித்து பொலிசில் புகார் தெரிவித்துள்ளதாகவும் சுங்கத்துறை அதிகாரிகள் தெரிவித்துள்ளனர்.

பாதுகாப்பு பெட்டகத்தில் வைக்கப்பட்டிருந்த தங்கம் மாயமானது குறித்து உயர்மட்ட அளவில் துறை ரீதியாக விசாரணைக்கும் உத்தரவிட்டுள்ளனர்.