மூதாட்டியை கெட்ட வார்த்தையால் திட்டிய கிளி: கூண்டோடு தூக்கி வந்து விசாரித்த பொலிஸ்

புனேயில் 85 வயது மூதாட்டியை கெட்ட வார்த்தையால் திட்டிய கிளியிடம் பொலிசார் விசாரணை நடத்திய சம்பவம் நடந்துள்ளது.
சந்திராபூர் மாவட்டம் ரஜூரா பகுதியை சேர்ந்த 85 வயதான ஜனாபாய், அவரது வளர்ப்பு மகன் ஸ்டீபன் சுரேஷ் இருவரும் அருகருகே உள்ள வீடுகளில் வசித்து வருகின்றனர்.

ஸ்டீபன் சுரேஷ் வளர்த்து வரும் "ஹரியால்" என்ற கிளி, ஜனாபாய் அந்த பகுதியை கடந்து செல்லும் போதெல்லாம், அவரை கெட்ட வார்த்தையால் திட்டியுள்ளது.

இதனால் எரிச்சலடைந்த அவர், கிளியின் அருகில் சென்று கண்டித்தும் அது செவி சாய்ப்பதாக தெரியவில்லை. பின்னர் இது தொடர்பாக அவர் பொலிசில் புகார் அளித்துள்ளார்.

அந்த புகாரை பெற்ற பொலிசார் அதனை எந்த பிரிவின்கீழ் பதிவு செய்வது என குழம்பியுள்ளனர்.

இதையடுத்து ஜனாபாயின் குற்றச்சாட்டு உண்மை தானா என்பதை ஆராய கிளியை அவர் அருகில் நிற்க வைத்து அதை பேச வைக்க முயற்சித்தனர்.

ஆனால் பொலிசார் முன்னிலையில் அந்தக் கிளி ஒரு வார்த்தை கூட வாயை திறந்து பேசவில்லை.

இதனால், குழப்பமடைந்த பொலிசார் அவர்கள் 3 பேரையும் வீட்டுக்கு அனுப்பி வைத்தனர்.

மேலும், இந்த சம்பவம் குறித்து பொலிசார் நடத்திய விசாரணையில், ஜனாபாயிக்கும், அவருடைய வளர்ப்பு மகனுக்கும் இடையே நிலத்தகராறு இருப்பதாகவும், வேண்டுமென்றே இந்த புகாரை தாக்கல் செய்திருக்கலாம் என்றும் கருதுகின்றனர்.

சர்ச்சையை ஏற்படுத்திய கிளியை வனத்துறையிடம் ஒப்படைக்க நடவடிக்கை எடுக்கப்படும் என்று தெரிவித்துள்ளனர்.