இந்திய வம்சாவளி பெண் மருத்துவரை பாராட்டிய ஒபாமா

இந்திய வம்சாவளியைச் சேர்ந்த பெண் மருத்துவர் சுமிதா கத்ரியை அமெரிக்க அதிபர் ஒபாமா பாராட்டியுள்ளார்.
நிலக்கரியால் இயங்கும் அனல் மின் நிலையங்கள் வெளியிட்டு வரும் வெப்பத்தையும், சுற்றுச்சூழல் மாசையும் கட்டுப்படுத்துவது தொடர்பாக ஒபாமா தலைமையில் வெள்ளை மாளிகையில் கருத்தரங்கம் நடைபெற்றது.

அதில் தலைமையுரை ஆற்றிய ஒபாமா, ஓஹியோ மாநிலத்தில் இயங்கிவரும் ஆஸ்துமா மருத்துவமனையின் இணை இயக்குனராக பொறுப்பு வகிக்கும் இந்திய வம்சாவளியைச் சேர்ந்த பெண் மருத்துவர் சுமிதா கத்ரியை வெகுவாக பாராட்டினார்.

சுற்றுச்சூழல் மாசை தடுப்பது தொடர்பாக பயனுள்ள ஆராய்ச்சிகளை நடத்திவரும் மருத்துவர் சுமிதா கத்ரி, தினந்தோறும் மாசினால் பாதிக்கப்படும் குடும்பங்களுக்கு தனது சேவையின் மூலம் உதவி வருகிறார்.
அவருக்கு எனது நன்றியை தெரிவித்துக்கொள்கிறேன் என ஒபாமா கூறியுள்ளார்.