ஐ.தே.க வில் ரணில் தனித்து தீர்மானங்களை எடுக்கின்றார்: அனுர பிரியதர்சன

ஐக்கிய தேசியக் கட்சியில், கட்சியின் தலைவர் ரணில் விக்ரமசிங்க தனித்து தீர்மானங்களை எடுத்து வருவதாக ஸ்ரீலங்கா சுதந்திரக் கட்சியின் பொதுச் செயலாளர் அனுர பிரியதர்சன யாபா தெரிவித்துள்ளார்.
பல லட்சக்கணக்கான அடிமட்ட கட்சி உறுப்பினர்கள் ஹம்பாந்தோட்டை மெதமுலனவிற்கு சென்று முன்னாள் ஜனாதிபதி மஹிந்த ராஜபக்சவிடம் அரசியலுக்கு வருமாறு கோரியிருந்தனர்.

இந்தக் கோரிக்கை கட்சியிலும் முன்வைக்கப்பட்டது. இந்தக் கோரிக்கையின் அடிப்படையிலேயே எமது மத்திய செயற்குழு நடவடிக்கைகளை எடுத்து வருகின்றது.

ஸ்ரீலங்கா சுதந்திரக் கட்சி மற்றும் ஐக்கிய மக்கள் சுதந்திரக் கூட்டமைப்பு என்பன கீழ் மட்ட உறுப்பினர்களின் கோரிக்கைகளுக்கு செவிமடுக்கும் பொறிமுறைமை ஒன்றை பின்பற்றி வருகின்றது.

ஐக்கிய தேசியக் கட்சியில் அவ்வாறான ஓர் நிலைமை கிடையாது.

ஐக்கிய தேசியக் கட்சியில் அடிமட்ட அல்லது கீழ் நிலை உறுப்பினர்களின் யோசனைகள் மத்திய செயற்குழுவினால் ஏற்றுக்கொள்ளப் படுவதில்லை.

கட்சியின் தலைவர் ரணில் விக்ரமசிங்கவின் உத்தரவுகள் மட்டுமே மத்திய செயற்குழுவினால் அமுல்படுத்தப்படுகின்றது என அனுர பிரியதர்சன யாபா செய்தியாளர் சந்திப்பொன்றில் தெரிவித்துள்ளார்.