மகிந்த எதிர்க்கட்சி எம்.பியாக நாடாளுமன்றத்தில் அமர தயாராகிறார்: எஸ்.எம்.மரிக்கார்

நிறைவேற்று அதிகாரம் கொண்ட ஜனாதிபதியாக பதவி வகித்த மகிந்த ராஜபக்ச மீண்டும் எதிர்க்கட்சி உறுப்பினராக நாடாளுமன்றத்திற்கு வர தயாராகி வருவதாக ஐக்கிய தேசியக் கட்சியின் மேல் மாகாண சபை உறுப்பினர் எஸ்.எம். மரிக்கார் தெரிவித்துள்ளார்.
கொழும்பு மாளிகாவத்தை பிரதேசத்தில் நேற்று நடைபெற்ற வைபவம் ஒன்றில் பேசும் போதே அவர் இதனை கூறியுள்ளார்.

நாடாளுமன்ற உறுப்பினராக தனது அரசியல் பயணத்தை தொடங்கிய மகிந்த ராஜபக்ச, நாட்டின் நிறைவேற்று அதிகாரம் கொண்ட ஜனாதிபதி பதவியையும் வகித்து விட்டு, எதிர்க்கட்சி உறுப்பினராக மீண்டும் நாடாளுமன்றத்தில் அங்கம் வகிக்க தயாராகி வருகிறார்.

முன்னாள் ஜனாதிபதி மகிந்த ராஜபக்ச, எதிர்வரும் பொதுத் தேர்தலில் ஜனாதிபதி மைத்திரிபால சிறிசேனவுடன் இணைந்து போட்டியிட்டாலும் தனித்து வேறு ஒரு அணியாக போட்டியிட்டாலும் நாட்டில் ஆட்சியமைக்க போவது ஐக்கிய தேசியக் கட்சியின் அரசாங்கமே எனவும் எஸ்.எம். மரிக்கார் குறிப்பிட்டுள்ளார்.