கருணாநிதியின் 92வது பிறந்தநாள்: திமுகவினர் உற்சாக கொண்டாட்டம்

திமுக தலைவர் கருணாநிதியின் 92வது பிறந்தநாளை இன்று திமுகவினர் சிறப்பாக கொண்டாடி வருகின்றனர்.
கருணாநிதிக்கு இன்று 91 வயது முடிந்து 92-வது வயது பிறக்கிறது. அவரது பிறந்தநாளை ஒட்டி கடந்த சில நாட்களாகவே தமிழகம் முழுவதும் பல்வேறு நிகழ்ச்சிகளை திமுகவினர் நடத்தி வருகின்றனர்.

இணையதளம், சமூக வலைதளங்கள் மூலம் கருணாநிதிக்கு பிறந்தநாள் வாழ்த்து தெரிவிக்க சிறப்பு ஏற்பாடுகள் செய்யப்பட்டுள்ளன.

கருணாநிதியின் 92வது பிறந்தநாளை முன்னிட்டு ஃபேஸ்புக், ட்விட்டர் உள்ளிட்ட சமூக வலைத்தளங்களில் ஏராளமானோர் வாழ்த்து தெரிவித்து வருகின்றனர்.

கருணாநிதியின் பிறந்தநாளை ஒட்டி உருவாக்கப்பட்டுள்ள #HBDkalaingar என்ற ஹேஸ்டேக் ட்விட்டர் டிரெண்டிங்கில் இந்திய அளவில் முதலிடம் பிடித்துள்ளது.

இன்று காலை முதலே திமுகவினரும், ஏராளமான பொதுமக்களும் தங்களின் வாழ்த்துக்களை பதிவிட்டு வருகின்றனர்.

கருணாநிதி, இன்று காலை 7 மணிக்கு சென்னை மெரினா கடற்கரையில் உள்ள அண்ணா நினைவிடத்திலும் 7.15 மணிக்கு வேப்பேரியில் உள்ள பெரியார் நினைவிடத்திலும் மரியாதை செலுத்துகிறார்.

பின்னர், தனது வீட்டில் குடும்பத்தினருடன் கேக் வெட்டி பிறந்தநாளை கொண்டாடுகிறார்.

காலை 9 மணி முதல் திமுக தலைமை அலுவலகமான அண்ணா அறிவாலயத்தில் உள்ள கலைஞர் அரங்கில் தொண்டர்கள், கட்சி நிர்வாகிகள், முக்கிய பிரமுகர்களைச் சந்தித்து வாழ்த்து பெறுகிறார்.

சென்னை மேற்கு மாவட்ட திமுக சார்பில் மாலை 6 மணிக்கு ராயப்பேட்டை ஒய்.எம்.சி.ஏ. மைதானத்தில் கருணாநிதி பிறந்த நாள் விழா பொதுக்கூட்டம் நடக்கிறது.

இதில் கட்சியின் பொதுச்செயலாளர் க.அன்பழகன், பொருளாளர் மு.க. ஸ்டாலின், முதன்மைச் செயலாளர் துரைமுருகன் உள்ளிட்டோர் பங்கேற்று வாழ்த்திப் பேசுகின்றனர். கருணாநிதி ஏற்புரை நிகழ்த்துகிறார்.

மத்திய கப்பல் போக்குவரத்து மற்றும் நெடுஞ்சாலைத் துறை இணை அமைச்சர் பொன்.ராதாகிருஷ்ணன், தமிழக பாஜக தலைவர் தமிழிசை சவுந்தரராஜன் ஆகியோர் கருணாநிதிக்கு பிறந்த நாள் வாழ்த்து தெரிவித்துள்ளனர்.