வித்தியாவின் ஆத்ம சாந்தி வேண்டி மலையக தொழிற்சங்கங்கள் ஒன்றிணைந்த கூட்டுப் பிரார்த்தனை

புங்குடுதீவில் வன்புணர்வுக்கு உட்படுத்தப்பட்டு கொலை செய்யப்பட்ட வித்தியாவிற்கு ஆத்ம சாந்தி வேண்டியும், இச்செயற்பாட்டிற்கு கண்டனம் தெரிவித்தும் புஸ்ஸல்லாவை நகரத்தில் தொழிற்சங்கங்கள் ஒன்றிணைந்த கூட்டுப்பிராத்தனை ஒன்றை மேற்கொண்டன.

இந்நிகழ்வில் மெழுகுவர்த்தி கொழுத்தப்பட்டு,மாணவி வித்தியாவிற்காக 3 நிமிட மௌன அஞ்சலியும் செலுத்தப்பட்டுள்ளது.



இதன் போது மலையக தொழிற்சங்கங்களான தொழிலாளர் தேசிய சங்கம்,மலையக மக்கள் முன்னணி,மத்திய மாகாண தொழிலாளர் முன்னணி போன்றவற்றின் அங்கத்தவர்கள் உட்பட அதிகாரிகள் பலரும் கலந்து கொண்டனர்.

இதன் போது மத்திய மாகாண தொழிலாளர் முன்னணியின் பொதுசெயலாளரும் முன்னாள் மத்திய மாகான சபை உறுப்பினருமான எஸ்.இராஜரட்ணம்,தொழிலாளர் தேசிய சங்கத்தின் இணைப்பாளர் ஏ. சன்முகராஜ் ஆகியோர் இரங்கல் உரையினை நிகழ்த்தினர்.

இங்கு வருகை தந்திருந்த தோட்டமக்கள், வித்தியாவிற்கு புஸ்ஸல்லாவை மக்களின் ஆழ்ந்த அனுதாபங்கள்,மாணவி வித்தியாவின் நிலை இனிமேல் தொடரமுடியாது. வித்தியாவின் ஆத்மா சாந்தியடைய பிரார்த்திக்கின்றோம். எங்கு நடந்தாலும் வன்முறைக்கும் துஷ்பிரயோகத்திற்கும் தண்டனை வேண்டும். என்ற சுலோகங்களை தாங்கி நின்றனர்.