மொரட்டுவ நகரசபை சுவரில் இன்னும் மஹிந்தவின் புகைப்படம் அகற்றப்படவில்லை!

கடந்த ஜனவரி மாதம் 8ம் திகதி நடைபெற்ற தேர்தலில் மஹிந்த ராஜபக்ச தோல்வியடைந்துள்ள நிலையிலும் மொரட்டுவ நகரசபை சுவரில் மஹிந்த ராஜபக்சவின் புகைப்படம் அகற்றப்படவில்லையென மக்கள் விடுதலை முன்னணியின் நகர சபை உறுப்பினர் நிஷாந்த பிர்னாந்து தெரிவித்துள்ளார்.

இன்று கூடிய நகர சபைக் கூட்டத்தின் போது அவர் இதனைக் கூறியுள்ளார்.

நகர சபையில் அரச தலைவர்களின் புகைப்படம் இருக்க வேண்டிய இடத்தில் இன்னும் ஜனாதிபதி மைத்திரிபால சிறிசேனவின் புகைப்படம் ஏற்றப்படவில்லையெனவும் அவர் சுட்டிக்காட்டியுள்ளார்.

இதற்கு ஆணையாளரும் பொறுப்புச் சொல்ல வேண்டும் எனவும் அவர் குறிப்பிட்டுள்ளார்.

யார் விரும்பாது போனாலும், தற்போது நாட்டின் ஜனாதிபதி மைத்திரிபால சிறிசேன என்பதை அனைவரும் தெரிந்து கொள்ள வேண்டும் எனவும் அவர் மேலும் கூறியுள்ளார்.