கடத்தப்பட்ட இலங்கையரை விடுவிக்க பெருந்தொகை பணயப்பணம் கோரும் ஆயுததாரிகள்

நைஜீரியாவில் வைத்து கடத்திச் செல்லப்பட்டுள்ள இலங்கை பொதுமகனை விடுவிக்க பணயப்பணம் கோரப்பட்டுள்ளது.
நைஜீரியாவின் ஒன்டோ என்ற பிரதேசத்தில் வைத்து இந்த வாரத்தில் இலங்கையர் ஒருவர் ஆயுததாரிகளால் கடத்தப்பட்டார்.

இதன்போது அவருக்கு பாதுகாப்புக்காக சென்ற பொலிஸ்காரர் ஒருவர் துப்பாக்கிதாரிகளால் சுட்டுக்கொல்லப்பட்டார்.

அத்துடன் இலங்கையர் பயணித்த வாகன சாரதி காயமடைந்தார்.

இந்தநிலையில் கடத்தப்பட்டவர், நைஜீரியாவின் இலங்கை தூதரக பணியாளரான கருணாரட்ன என்ற அடையாளம் காணப்பட்டுள்ளார்.

இவர், இத்தாலிய நிறுவனம் ஒன்றுக்காக கடந்த 10 வருடங்களாக நைஜீரியாவில் தங்கி பணியாற்றி வருகிறார்.

இந்தநிலையில் கடத்தல்காரர்கள், கருணாரட்னவின் குடும்பத்தினருடன் தொடர்புக்கொண்டதாக நைஜீரிய அதிகாரிகள் தெரிவித்துள்ளனர்.

இதன்போது கருணாரட்னவை விடுவிக்கவேண்டுமானால் பெருந்தொகை பணத்தை தரவேண்டும் என்று கடத்தல்காரர்கள் கோரியுள்ளதாக தகவல்கள் தெரிவிக்கின்றன.