ஜெயலலிதாவுக்காக பதவியை ராஜினாமா செய்ய தயார்! எம்.எல்.ஏ. சுந்தரராஜன்

அ.தி.மு.க. பொதுச்செயலர் ஜெயலலிதா போட்டியிடுவதற்காக தாம் எம்.எல்.ஏ. பதவியை ராஜினாமா செய்ய தயார் என்று தே.மு.தி.க. எம்.எல்.ஏ. சுந்தரராஜன் அறிவித்துள்ளார்.
இது தொடர்பாக தான் ஜெயலலிதாவை நேரில் சந்தித்து பேசியதாகவும், இதை செய்வதை புண்ணியமாக கருதுகிறேன் எனவும் அவர் தெரிவித்துள்ளார்

இது குறித்து மதுரை மத்திய தொகுதி எம்.எல்.ஏ. சுந்தரராஜன் செய்தியாளர்களுக்கு அளித்த பேட்டியில், கடந்த 2011ம் ஆண்டு சட்டசபை தேர்தலில் முதல்வர் ஜெயலலிதா தலைமையில் தே.மு.தி.க. கூட்டணி அமைத்து மக்களை சந்தித்தது.

மதுரை மத்திய தொகுதியில் நான் வெற்றி பெற்றேன். அதே போல் விஜயகாந்த் உள்ளிட்ட 26 பேரையும் வெற்றி பெற செய்தவர் அம்மா தான்.

அந்த நன்றியை மறந்து விஜயகாந்த் செயல்பட்டார். அவரது செயல்பாடு பிடிக்காததால் அ.தி.மு.க. அரசுக்கு ஆதரவாக செயல்பட்டு வருகிறோம்.

தற்போது அம்மா மீண்டும் முதல்வராகப் பதவி ஏற்க இருக்கிறார். அவர் மதுரை மத்திய தொகுதியில் போட்டியிட வசதியாக நான் எம்.எல்.ஏ. பதவியில் இருந்து விலக தயாராக இருக்கிறேன்.

எனக்கு இந்த பதவியை பெற்று தந்தது அவர் தான். அவருக்காக பதவி விலகுவது நான் செய்த புண்ணியமாக கருதுகிறேன் என்று தெரிவித்துள்ளார்.