ஆஸியில் புவியதிர்வு ஏற்பட்டால் குமார் குணரட்னம் இலங்கையில் வசிக்க முடியும்?: முன்னிலை சோசலிஸக்கட்சி கேள்வி

நேபாளத்தில் புவியதிர்வு ஏற்பட்டதன் பின்னர், அரசியல் அச்சம் காரணமாக இலங்கையில் இருந்து வெளியேறிய ஊடகவியலாளர்கள் உட்பட்டவர்கள் நாடு திரும்பலாம் என்று அரசாங்கம் அறிவித்துள்ளமையை முன்னிலை சோசலிஸக்கட்சி விவாதத்திற்கு உட்படுத்தியுள்ளது.
நல்லாட்சியின் கீழ் இந்த வாய்ப்பை வழங்கியுள்ள அரசாங்கம், ஏன் இன்னும் முன்னிலை சோசலிஸக்கட்சியின் மத்தியக்குழு உறுப்பினர் குமார் குணரட்னத்துக்கு இலங்கையின் பிரஜாவுரிமையை தர மறுக்கிறது என்று கட்சியின் அரசியல்பீட உறுப்பினர் துமிந்த நாகமுவ கேள்வி எழுப்பியுள்ளார்.

செய்தியாளர்கள் மத்தியில் அவர் இந்த கேள்வியை முன்வைத்துள்ளார். இலங்கையில் குறிப்பாக இரட்டை பிரஜாவுரிமைக்கு அங்கீகாரம் வழங்கப்பட்டுள்ள தற்போதைய நிலையிலும் அரசியல் அச்சம் காரணமாக அவுஸ்திரேலியாவுக்கு சென்ற குமார் குணரட்னத்திற்கு இலங்கை பிரஜாவுரிமையை வழங்க மறுப்பது ஏன் என்றும் அவர் கேள்வி எழுப்பியுள்ளார்.

இலங்கை பிரஜாவுரிமையை பெற்று கொள்வதற்காக குமார் குணரட்னம் தாக்கல் செய்திருந்த விண்ணப்பத்திற்கு கூட இன்னும் அரசாங்கத்தினால் பதில் வழங்கப்படவில்லை எனவும் நாகமுவ சுட்டிக்காட்டியுள்ளார்.

இந்தநிலையில் அரசாங்கத்தின் தர்க்கப்படி நேபாளத்தில் ஏற்பட்ட புவியதிர்வை போன்று அவுஸ்திரேலியாவிலும் ஏற்பட்டால் குமார் குணரட்னம், இலங்கைக்கு இலகுவாக வந்து அரசியலில் ஈடுபடமுடியும் என்றே தாம் நம்புவதாக நாகமுவ மேலும் தெரிவித்துள்ளார்.