மியன்மாரில் இலங்கை மீனவர்கள் விடுதலை

மியன்மார் கடல் எல்லைக்குள் அத்துமீறி நுழைந்ததாக தெரிவித்து அந்த நாட்டின் பாதுகாப்பு பிரிவினரால் கைதுசெய்யப்பட்ட இலங்கை மீனவர்கள் 17 பேர் விடுதலை செய்யப்பட்டுள்ளனர்.
மியன்மார் ஜனாதிபதியின் பணிப்புரைக்கமைய, இந்த இலங்கையர்களுக்கு எதிராக அந்த நாட்டின் குற்றவிசாரணை நீதிமன்றத்தில் தாக்கல் செய்யப்பட்டிருந்த வழக்கு கடந்த 6ம் திகதி மீள பெறப்பட்டுள்ளதாக வெளிவிவகார அமைச்சு குறிப்பிட்டுள்ளது.

இதன் பிரகாரம் அடுத்த சில நாட்களுக்குள் விடுதலை செய்யப்பட்ட இலங்கை மீனவர்கள் நாடு திரும்புவார்கள் என எதிர்ப்பார்க்கப்படுகின்றது.

இலங்கை அரசாங்கத்தினால் விடுக்கப்பட்ட விசேட கோரிக்கையின் பேரிலேயே, குறித்த மீனவர்களை விடுதலை செய்யுமாறு மியன்மார் ஜனாதிபதி பணிப்புரை விடுத்துள்ளார்.

மியன்மார் கடல் எல்லைக்குள் அத்துமீறி பிரவேசித்த இலங்கை மீனவர்கள் 17 பேரும் கடந்த வருடத்தின் ஒக்டோபர் மாதம் அந்நாட்டு அதிகாரிகளினால் கைது செய்யப்பட்டமை குறிப்பிடத்தக்கது.