சீனாவுக்கோ, இந்தியாவுக்கோ சார்பான நாடாக இலங்கை இல்லை: பிரதமர்

இலங்கை சீனாவுக்கோ இந்தியாவுக்கோ சார்பான நாடு இல்லை என பிரதமர் ரணில் விக்கிரமசிங்க தெரிவித்துள்ளார்.
குருவாயூர் கோயிலில் ஊடகவியலாளர்களுடன் இடம்பெற்ற சந்திப்பிலேயே அவர் இதனைக் குறிப்பிட்டுள்ளார்.

இந்திய மீனவர்கள் தொடர்பாக பிரதமர் வெளியிட்ட சர்ச்சைக்குரிய கருத்து குறித்து செய்தியாளர்கள் கேள்வி எழுப்பிய போது, இலங்கை அரசாங்கம் இலங்கையர்களின் நன்மையை அடிப்படையாகக் கொண்டே செயற்படுவதாக தெரிவித்தார்.

இந்தியாவிற்கும், இலங்கைக்கும் இடையில் மேலும் சுமூகமான உறவு அவசியம் எனவும் இரு நாடுகளும் முன்னோக்கி நகர வேண்டும்.

இதன் ஒரு அங்கமாகவே இந்தியப் பிரதமர் நரேந்திர மோடியின் இலங்கை விஜயமும், இலங்கை ஜனாதிபதி மைத்திரிபால சிறிசேனவின் இந்திய விஜயமும் காணப்பட்டது என அவர் குறிப்பிட்டுள்ளார்.

கேரள கலாச்சாரம் பற்றி இலங்கை மக்களுக்கு விழிப்புணர்வை ஏற்படுத்துமாறு குருவாயூர் தேவஸ்தானம் விடுத்த வேண்டுகோளை ஆக்கபூர்வமாக பரிசீலிப்பதாகவும் பிரதமர் இதன் போது தெரிவித்துள்ளார்.

இலங்கையின் ஜனாதிபதி தேர்தல் முடிவுகள் தனக்கு சாதகமாக அமைந்தால் குருவாயூர் கோயிலுக்கு வருவதாக வேண்டியிருந்தமையினால்,அந்த வேண்டுதலை நிறைவேற்றவே தான் இங்கு வந்ததாகவும் பிரதமர் ஊடகவியலாளர்களிடம் சுட்டிக்காட்டியிருந்தார்.