மே தினக் கூட்டத்தில் பங்கேற்குமாறு மஹிந்தவிற்கு சுதந்திரக் கட்சி உத்தியோகபூர்வ அழைப்பு

மே தினக் கூட்டத்தில் பங்கேற்குமாறு முன்னாள் ஜனாதிபதி மஹிந்த ராபஜபக்சவிற்கு உத்தியோகபூர்வமாக அழைப்பு விடுக்கப்பட்டுள்ளது.
நாரஹன்பிட்டி அபயராமயவில் வைத்து முன்னாள் ஜனாதிபதிக்கு இந்த அழைப்பு விடுக்கப்பட்டுள்ளது.

கட்சியின் பொதுச் செயலாளர் அனுர பிரியதர்சன யாப்பாவினால் இந்த அழைப்பு விடுக்கப்பட்டுள்ளது.

மஹிந்த ராஜபக்ச, தென் மாகாண பிரதேச சபை உறுப்பினர்களுடன் நேற்று சந்திப்பு ஒன்றை நடத்தியிருந்தார்.

இந்த சந்திப்பிற்கு இடைநடுவில் அனுர பிரியதர்சன யாப்பா, அபயராமயவிற்கு சென்று அழைப்பினை விடுத்துள்ளார்.

அனுர பிரியதர்சன அபயராமவிற்கு சென்ற போது குழுமியிருந்த பிரதேச சபை உறுப்பினர்கள் இன்னும் வருகிறார்கள் இன்னும் வருகிறார்கள் என கோசமிட்டு மகிழ்ச்சியை வெளிப்படுத்தியுள்ளனர்.

எனினும், தாம் வந்த விடயத்தை அனுர பிரியதர்சன யாப்பா, மஹிந்தவிற்கு அறிவித்துள்ளார்.

அதன் போது கூட்டம் முடிவடையும் வரையில் காத்திருக்குமாறு மஹிந்த, அனுரவிற்கு தெரிவித்துள்ளார்.

முன்னாள் ஜனாதிபதியை பிரதமர் வேட்பாளராக நியமிக்காவிட்டால் ஸ்ரீலங்கா சுதந்திரக் கட்சியின் மே தினக் கூட்டத்தை பகிஸ்கரிக்கப் போவதாக தென் மாகாண பிரதேச சபை உறுப்பினர்கள் தெரிவித்துள்ளனர்.