இந்தியா வந்தடைந்த அவுஸ்திரேலிய பெண் பொறியாளரின் சடலம்: இன்று இறுதி சடங்கு

அவுஸ்திரேலியாவில் மர்ம நபர்களால் கத்தியால் குத்தி கொல்லப்பட்ட பெண் பொறியாளரின் உடல் பெங்களூருக்கு கொண்டு வரப்பட்டுள்ளது
அவுஸ்திரேலியாவின் சிட்னியில் தகவல் தொழில்நுட்ப நிறுவனத்தில் வேலை பார்த்துவந்த பெங்களூரைச் சேர்ந்த பெண் பொறியாளர் பிரபா, கடந்த 7ம் திகதி வேலை முடிந்து வீட்டிற்கு சென்று கொண்டிருந்த போது மர்மநபர்கள் கத்தியால் குத்திக் கொலை செய்துவிட்டு ஓடிவிட்டனர்.

இந்த கொலை சம்பவம் குறித்து சிட்னி பொலிசார் தொடர்ந்து விசாரணை நடத்தி வருகின்றனர்.

பிரபாவின் கணவரும் அவர்களது 9 வயது மகளும், பெங்களூரில் உள்ள சந்திரா லே–அவுட் அருகே பாபுஜிநகரில் வசித்து வருகின்றனர்.

தனது மனைவி கொலை செய்யப்பட்ட தகவலை அறிந்ததையடுத்து அவுஸ்திரேலியாவுக்கு சென்ற அருண்குமாரிடம், பிரேத பரிசோதனைக்கு பிறகு பிரபாவின் உடல் ஒப்படைக்கப்பட்டது.

இதையடுத்து பிரபாவின் உடல் விமானம் மூலம் இரவு பெங்களூருவுக்கு கொண்டு வரப்பட்டு, பெங்களூரு பாபுஜிநகரில் நகரில் உள்ள வீட்டில் வைக்கப்பட்டுள்ளது.

மேலும், இன்று அங்கிருந்து பிரபாவின் உடல் அவரது சொந்த ஊரான மங்களூரு அருகே உள்ள புத்தூருக்கு கொண்டு செல்லப்பட்டு, இறுதிச்சடங்கு நடைபெற உள்ளதாக தகவல்கள் தெரிவிக்கின்றன.