மகிந்தவை நாட்டின் பிரதமராக நியமிக்க வேண்டும்: அத்தனகல்ல பிரதேச சபையில் யோசனை

ஸ்ரீலங்கா சுதந்திர கட்சியை வலுவான கட்சியாக முன்னெடுத்து செல்லக் கூடிய தலைவர் என்ற வகையில், முன்னாள் ஜனாதிபதி மகிந்த ராஜபக்சவை நாட்டில் பிரதமராக நியமிக்க வேண்டும் என அத்தனகல்ல பிரதேச சபையில் யோசனை ஒன்று நிறைவேற்றப்பட்டுள்ளது.
எதிர்வரும் பொது தேர்தலில் ஐக்கிய மக்கள் சுதந்திர முன்னணியின் பிரதமர் வேட்பாளராக முன்னாள் ஜனாதிபதி நிறுத்தப்பட வேண்டும் எனவும் அந்த யோசனையில் தெரிவிக்கப்பட்டுள்ளது.

அண்மையில் நடைபெற்ற பிரதேச சபையின் மாதாந்த கூட்டத்தில் ஆளும் மற்றும் எதிர்க்கட்சியின் எந்த எதிர்ப்புகளும் இன்றி இந்த யோசனை நிறைவேற்றப்பட்டதாக அத்தனகல்ல பிரதேச சபையின் தலைவர் பிரியந்த புஷ்பகுமார தெரிவித்துள்ளார்.

அத்தனகல்ல பிரதேசம் பண்டாரநாயக்கவினரின் கோட்டை என கூறப்படுவதுண்டு. இப்படியான நிலையில், மகிந்தவுக்கு ஆதரவான யோசனை ஒன்று பிரதேச சபையில் நிறைவேற்றப்பட்டுள்ளமை குறிப்பிடத்தக்கது.