குரங்குகளின் வதிவிடமாக மாறிவரும் இந்திய வீட்டுத்திட்டம்?

மாந்தை மேற்கு பிரதேச செயலாளர் பிரிவில் உள்ள கிராம மக்கள் பலருக்கு இந்திய வீட்டுத்திட்டம் வழங்கப்படாததால் அம்மக்கள் பல்வேறு சிரமங்களை எதிர்நோக்கி வருகின்றனர்.
குறிப்பாக வேட்டையன் முறிப்பு,மாளிகை திடல்,மினுக்கன்,கட்டைக்காடு இக்கிராமத்தில் வசிக்கும் பல மக்களுக்கு இன்றுவரை இந்திய வீட்டுத்திட்டம் வழங்கப்படவில்லை.

ஆனால் புத்தளம், சிலாபம் பகுதிகளில் வாழும் மக்களுக்கு இப்பகுதியில் இந்திய வீடுகள் வழங்கப்பட்டுள்ளதாக தெரிவிக்கின்றனர்.

இக் கிராமத்தில் வாழும் மக்கள் பலர் வீடுகள் இன்றி பல்வேறு சிரமங்களுக்கு முகம்கொடுத்து வரும் நிலையில் இக்கிராமத்தில் வசிக்காது புத்தளம் மற்றும் சிலாபம் பகுதியில் வாழ்ந்துவரும் மக்களுக்கு குறித்த வீட்டுத்திட்டம் அரசியல் செல்லாக்கு அடிப்படையில் வழங்கப்பட்டுள்ளதால் இக்கிராம மக்கள் விசனமடைந்துள்ளனர்.

புத்தளம்,சிலாபம் பகுதியில் வசித்துவரும் மக்கள் குறித்த வீட்டுத்திட்டத்தை பெற்றுள்ள போதும் அவர்களில் அனேகமானோர் குறித்த கிராமங்களில் வாழவிரும்பாத நிலையில் புத்தளம்,சிலாபம் பகுதியிலேயே வாழ்ந்து வருகின்றனர்.

அரசியல் தலையீடு காரணமாக வழங்கப்பட்ட வீடுகளில் மனிதர்கள் வாழாமல் குரங்குகள் வதிவிடமாக மாறிவருகிறது.

குறித்த கிராமத்தில் வழங்கப்பட்ட வீடுகளில் பல இன்று வரை மனித நடமாட்டம் அற்ற வீடுகளாகவே காணப்படுகிறது.

இவ் வீட்டு உரிமையாளர்களுக்கு புத்தளம் மற்றும் சிலாபம் போன்ற பகுதிகளில் வீடுகள் உள்ளதால் அவர்கள் இன்றுவரை இங்கு குடியோறமல் தவிர்த்து வருகின்றனர்.

ஆனால் இக் கிராமத்தில் வாழ்ந்து வரும் பல மக்கள் வீடுகள் இன்றி இன்றுவரை தற்காலிக குடிசைகளில் வாழ்ந்து வருகின்றனர். இவர்கள் இந்திய வீட்டுத்திட்டத்தை தமக்கும் பெற்று தரும்படி வேண்டுகோள் விடுக்கின்றனர்.

அதிகாரிகள் இந்திய வீட்டுத்திட்டத்தை பெற்று வருவதாக இம்மக்களுக்கு கூறியிருந்த போதும் இன்று வரை அவ் வீட்டுத்திட்டம் அம் மக்களுக்கு வழங்க நடவடிக்கை எடுக்கபடவில்லை என தெரிவிக்கின்றனர்.

எனவே சம்ந்தப்பட்ட அதிகாரிகள் வீட்டுத்திட்டத்தை பெற்றுத்தர வேண்டும் என மக்கள் வேண்டுகொள் விடுக்கின்றனர்.

-