சாலையில் பெண்ணுக்கு நேர்ந்த அவமானம்: வீடியோவால் பரபரப்பு

குஜராத்தில் காரில் சென்று கொண்டிருந்த பெண் ஒருவர் அருகில் வந்த வாகனம் மீது தெரியாமல் உரசியதால், அந்த வாகனத்தில் இருந்த நபர் கெட்ட வார்த்தைகளில் திட்டியுள்ளார்.
அகமதாபாத்தில், உறவினர் ஒருவரைப் பார்க்க தனது காரில் மருத்துவமனைக்குச் சென்று கொண்டிருந்த அமி தஹிலியானி என்ற பெண் ஒரு காரின் மீது லேசாக உரசியுள்ளார்.

இதுபற்றி அவர் கூறுகையில், நான் உரசியதை அடுத்து பயத்தில் காரிலிருந்தபடியே அந்த மன்னிப்புக் கோரினேன்.

அப்போது காரிலிருந்து இறங்கி வந்த அந்த நப‌ர், என்னைக் கெட்ட வார்த்தைகளில் கண்டபடி திட்ட ஆரம்பித்துவிட்டார்.

சாலையில் கூட்டம் கூடியதால் எனக்கு ஒரே அவமானமாகப் போய்விட்டது.

மேலும், யாரையோ கைபேசியில் அழைத்த அவர், தனது காரிலிருந்த குழந்தையை அவர் நண்பரிடம் கொடுத்துவிட்டு, படுகோபமாக தனது காரால் எனது காரை ஆத்திரம் தீர வேண்டுமென்றே இடிக்க ஆரம்பித்தார்.

நான் சீட் பெல்ட் போட்டதால் எனக்கு அடி ஏதும் படவில்லை என்று தெரிவித்துள்ளார்.

இதை அங்கே வேடிக்கை பார்த்துக்கொண்டிருந்த ஒருவர் வீடியோவாக எடுத்து இணையத்தில் வெளியிட்டதால், பரபரப்பாகிவிட்டது இந்த வீடியோ.

இந்த வீடியோவில், டிராஃபிக் பொலிசார் ஒருவர் வேடிக்கை பார்த்துக் கொண்டிருந்ததும் பதிவாகி இருப்பதால், குஜராத் காவல்துறையினருக்கு இப்போது பிரச்சனை வந்துள்ளது.

தற்போது இந்த வீடியோ பரபரப்பாக பேசப்பட்டதும், அந்த காரை ஓட்டிய யோகேஷ் புஜாரா என்பவரையும், அவரது நண்பரையும் கைது செய்துள்ளனர்.