இலங்கையின் நல்லிணக்க முயற்சிகள் பாராட்டத்தக்கவை: பொட்ஸ்வானா

இலங்கையின் தற்போதைய அரசாங்கம் மனித உரிமை மீறல் பிரச்சினைகளுக்கு தீர்வு கண்டு நாட்டை முன்னேற்றப்பாதையில் கொண்டு செல்ல, இந்த சந்தர்ப்பத்தை பயன்படுத்தி கொள்ளும் என பொட்ஸ்வானா நம்பிக்கை வெளியிட்டுள்ளது.
ஐ.நா மனித உரிமை பேரவையின் 28வது அமர்வில் கலந்து கொண்டு உரையாற்றும் போதே பொட்ஸ்வானாவின் வெளிவிவகார அமைச்சர் பெலோனமி வென்சன் மொய்டொய் தெரிவித்துள்ளார்.

இலங்கையில் கடந்த ஜனவரி மாதம் நடைபெற்ற ஜனாதிபதி தேர்தலில் மக்கள் சிறந்த தலைமைத்துவத்தை தெரிவு செய்துள்ளனர் என அவர் பாராட்டியுள்ளார்.

ஐ.நா அறிக்கையை எதிர்வரும் செப்டெம்பர் மாதம் சமர்பிப்பதற்கு ஐ.நா மனித உரிமைகள் ஆணையம் தீர்மானித்துள்ளது.

இந்த சந்தர்ப்பத்தை இலங்கை அரசாங்கம் பயன்படுத்தி இலங்கையில் அமைதியையும், பாதுகாப்பையும் மீண்டும் வலுப்படுத்துவதற்கும், நல்லிணக்கத்தை ஏற்படுத்துவதற்கான முயற்சிகளிலும் ஈடுபடும் என அவர் நம்பிக்கை வெளியிட்டுள்ளார்.

இதேவேளை இலங்கையின் தற்போதைய அரசாங்கம் மேற்கொண்டுள்ள நல்லிணக்க முயற்சிகளுக்கு பாராட்டு தெரிவித்துள்ளதுடன், அதற்கு தேவையான அனைத்து ஒத்துழைப்புக்களையும் தமது அரசாங்கம் வழங்கும் என ஜப்பான் தெரிவித்துள்ளது.