சட்டவிரோத ஏற்றுமதிக்கு தயாராகவிருந்த மீன்கள் கைப்பற்றல்

சட்டவிரோத ஏற்றுமதிக்கு தயார் நிலையில் வைக்கப்பட்டிருந்த 180 அரிய வகை மீன்கள் விமான நிலையத்தில் வைத்து சுங்கப்பிரிவினரால் கைப்பற்றப்பட்டுள்ளன.
விமான நிலைய ஏற்றுமதி பிரிவில் மேற்கொள்ளப்பட்ட சோதனையின் போதே இந்த சட்டவிரோத நடவடிக்கை கண்டுபிடிக்கப்பட்டதாக சுங்கப் பிரிவு ஊடகப் பேச்சாளர் லெஸ்லி காமினி தெரிவித்துள்ளார்.

அருகிவரும் உயிரினங்கள் தொடர்பான பதிவேட்டில் உள்ளடக்கப்பட்ட மீன் இனம் ஒன்றை நீர்கொழும்பிலுள்ள அலங்கார மீன்கள் ஏற்றுமதி செய்யும் நிறுவனம் தென்னாபிரிக்காவுக்கு ஏற்றுமதி செய்ய முயற்சித்துள்ளது.

இந்நிலையில் பறிமுதல் செய்யப்பட்ட மீன்கள் தெஹிவளை மிருகக்காட்சிசாலையில் இன்று ஒப்படைக்கப்பட்டதாக சுங்கப் பிரிவு பேச்சாளர் தெரிவித்துள்ளார்.

அதேவேளை சட்டவிரோதமான முறையில் மீன்களை ஏற்றுமதி செய்யவிருந்த நிறுவனத்திற்கு அபராதமும் விதிக்கப்பட்டுள்ளது.