இலங்கை சிறுவர்களின் போஷாக்கிற்கு ஐ.நா உதவி

இலங்கை சிறுவர்களின் போஷாக்கை மேம்படுத்தல் உள்ளிட்ட சிறுவர் அபிவிருத்தி நடவடிக்கைகளுக்காக ஐ.நா உணவு மற்றும் விவசாய அமைப்பு அனுசரணை வழங்கவுள்ளது.
சிறுவர் விவகார அமைச்சில் இராஜாங்க அமைச்சர் ரோசி சேனாநாயக்கவுடனான சந்திப்பின் போது ஐ.நா அமைப்பின் உணவு மற்றும் விவசாய அமைப்பின் பிரதிநிதி பெத் க்ரோபோர்ட் இதனை தெரிவித்துள்ளார்.

இதன்படி குழந்தைகளின் போஷாக்கை மேம்படுத்துவதற்காக நூறு நாள் வேலைத்திட்டத்தில் அறிமுகப்படுத்தப்பட்ட கர்ப்பிணித் தாய்மாருக்கு 20 ஆயிரம் ரூபா வழங்கும் நடவடிக்கை தொடர்பில் ஐ.நா பிரதிநிதிக்கு விளக்கமளிக்கப்பட்டது.

பாடசாலையை கேந்திரமாக கொண்டு ஆரம்ப பருவத்தில் முன்னெடுக்கப்பட வேண்டிய உணவு போஷாக்கு திட்டம், போஷணை தொடர்பாக தெளிவூட்டும் திட்டம் குறித்தும் அமைச்சு விசேட கவனம் செலுத்துவதாக அமைச்சர் ரோசி சேனாநாயக்க தெரிவித்தார்.

இத்திட்டங்கள் குறித்து சிறுவர் போஷாக்கு செயற்றிட்டத்திற்கு ஐ.நா ஒத்துழைப்பை பெற்றுக்கொடுப்பதாக ஐ.நா அமைப்பின் உணவு மற்றும் விவசாய அமைப்பின் பிரதிநிதி பெத் க்ரோபோர்ட் உறுதியளித்தார்.