இலங்கை அகதிகளுக்கு தமிழக அரச தொழில் பயிற்சி நிறுவனங்களில் இட ஒதுக்கீடு

அரசினர் தொழிற்பயிற்சி நிலையங்களில் இலங்கை தமிழ் அகதி மாணவ, மாணவியர்கள் அனுமதிக்கு 5 சதவீத இடஒதுக்கீடு செய்து தமிழக அரசு உத்தரவிட்டுள்ளதாக இந்திய ஊடகம் ஒன்று செய்தி வெளியிட்டுள்ளது.
தமிழக வேலைவாய்ப்பு மற்றும் பயிற்சித்துறை இயக்குநர், அரசு கலை மற்றும் அறிவியல் கல்லூரிகளில் சேர்க்கைக்கு உள்ள நடைமுறைகளை, அரசு தொழிற்பயிற்சி நிலையங்களில் இலங்கை தமிழ் அகதி மாணவர்களின் சேர்க்கையிலும் பின்பற்றலாம் என அரசுக்கு பரிந்துரைத்துள்ளார்.

தமிழகப் பள்ளிக்கூடங்களில் படித்த இலங்கை அகதிகளுடைய குழந்தைகளை பொதுப்பட்டியலில், தரவரிசையின் அடிப்படையில், அரசு தொழிற்பயிற்சி நிலையங்களில் சேர்த்துக் கொள்ளலாம் என்றும் பரிந்துரைத்துள்ளார்.

ஈழ அகதிகள் மறுவாழ்வு நிறுவனத்தின் கோரிக்கையினையும், வேலைவாய்ப்பு மற்றும் பயிற்சித்துறை இயக்குநரின் பரிந்துரையினையும் அரசு பரிசீலித்து, அரசு தொழிற்பயிற்சி நிலையங்களில் இனிவரும் கல்வியாண்டுகளில் இலங்கை தமிழ் அகதி மாணவர்களை, தமிழக பள்ளிக்கூடங்களில் படித்த இலங்கை அகதிகளுடைய குழந்தைகளை பொதுப்பட்டியல் தரவரிசையின் அடிப்படையில் அரசுத் தொழிற்பயிற்சி நிலையங்களில் சேர்த்துக் கொள்ளலாம். இதற்காக 5 சதவீத இடஒதுக்கீடு அளிக்கப்படுகிறது என அரசு உத்தரவிட்டுள்ளது.

மேலும் சம்பந்தப்பட்ட தலைமையிடத்து வட்டாட்சியரிடமிருந்து பெறப்பட்ட ஆளறிச் சான்று, அகதிகள் முகாம்களில் பதிவு செய்யப் பெறாதவர்கள் அவர்களுடைய விசா மற்றும் கடவுச்சீட்டுடன் விண்ணப்பிக்க வேண்டும் என்ற நிபந்தனையுடன், இலங்கை அகதி மாணவர்களை பொதுப்பட்டியலில் தரவரிசை அடிப்படையில் அரசு தொழிற் பயிற்சி நிலையங்களில் சேர்த்துக் கொள்ளலாம் என்னும் நடைமுறைகளை பின்பற்றி சேர்க்கைக்கு அனுமதிக்கலாம் என்றும் அரசு உத்தரவிட்டுள்ளது