உத்திரபிரதேசத்தில் ரயில் பெட்டிகள் தடம்புரண்டு கோர விபத்து: 22 பேர் பலி

by oviya Fri Mar 20, 2015 12:12 pm

உத்திரபிரதேசத்தில் எக்ஸ்பிரஸ் ரயில் ஒன்று தடம்புரண்டு விபத்துக்குள்ளானதில் 22 பேர் பலியாகியுள்ளனர், 150 பேர் படுகாயமடைந்துள்ளனர்.
உத்தரபிரதேச மாநிலம் பரேலி மாவட்டத்தில் பச்ராவன் கிராமத்துக்கு அருகே இன்று காலை 9.30 மணியளவில் டேராடூன்- வாரணாசி ஜனதா எக்ஸ்பிரஸ் ரயில் விபத்துக்குள்ளானது.

இந்த விபத்தில் ரயிலின் என்ஜின் உட்பட மூன்று பெட்டிகள் தடம்புரண்டு விபத்துக்குள்ளானதில் 22 பேர் பலியாகியுள்ளனர், 150க்கும் மேற்பட்டோர் காயமடைந்துள்ளனர்.

தொடர்ந்து மீட்புப்பணிகள் நடைபெற்று வருவதால், பலி எண்ணிக்கை மேலும் உயரலாம் என அஞ்சப்படுகிறது.

விபத்து தொடர்பாக ரயில்வே செய்தித் தொடர்பாளர் அனில் சக்சேனா கூறுகையில், முதற்கட்ட விசாரணையில் ரயில் ஓட்டுநரின் கவனக்குறைவால் விபத்து நடந்திருப்பதாக தெரியவந்துள்ளதாகாவும், விபத்து தொடர்பாக விசாரணைக்கு உத்தரவிடப்பட்டுள்ளதாகவும் தெரிவித்துள்ளார்.

இதற்கிடையில் ரயில் விபத்தில் உயிரிழந்தவர் குடும்பத்துக்கு தலா ரூ.2 லட்சமும், படுகாயமடைந்தவர்களுக்கு ரூ. 50,000, லேசான காயமடைந்தவர்களுக்கு ரூ.20,000மும் வழக்க ரயில்வே நிர்வாகம் உத்தரவிட்டுள்ளது.