கொழும்பில் தரமான உணவகங்களை தெரிவு செய்யும் பணி ஆரம்பம்

தூர இடங்களிலிருந்து வருகை தரும் மக்களின் நலனை கருத்திற்கொண்டு கொழும்பிலுள்ள உணவகங்களை பரிசோதனைக்குட்படுத்த கொழும்பு மாநகர சபை தீர்மானித்துள்ளது.
இந்த பரிசோதனை நடவடிக்கைகள் இன்று முதல் மேற்கொள்ளப்படவுள்ளதாக மாநகர வைத்திய அதிகாரி ருவன் விஜேமுனி தெரிவித்துள்ளார்.

இந்த பரிசோதனை நடவடிக்கைகளின் பின்னர் தரமான உணவகங்களுக்கு தரச்சான்றிதழ் வழங்கப்படவுள்ளதாகவும் அவர் தெரிவித்தார்.

இதன்படி தூர பிரதேசங்களிலிருந்து கொழும்பிற்கு வருகை தரும் மக்கள் எந்தவித அச்சமுமின்றி சான்றிதழ் உள்ள உணவகங்களில் உணவு உட்கொள்ள முடியும் என மாநகர வைத்திய அதிகாரி சுட்டிக்காட்டியுள்ளார்.

50 உணவகங்களில் சோதனைகளை மேற்கொண்டு இன்று முதல் இந்த தர சான்றிதழ் வழங்கப்படவுள்ளதாகவும் அவர் குறிப்பிட்டார்.

கொழும்பு இலங்கையின் தலைநகரமென்பதால் வெளிநாடுகளிலிருந்தும், நாட்டின் ஏனைய பகுதிகளிலிருந்தும் நாளொன்றுக்கு இலட்சக்கணக்கான மக்கள் வருகை தருகின்றனர்.

இதற்கமைய கொழும்பு நகரத்திற்கு வருகை தரும் மக்களை முறையாக அனுசரிப்பது மாத்திரமின்றி அவர்களின் சுகாதார நலன் குறித்தும் அவதானம் செலுத்த வேண்டியது மாநகர சபையின் கடமை என மாநகர வைத்திய அதிகாரி தெரிவித்துள்ளார்.