இலங்கை– அமெரிக்க உறவுகள் குறித்து வொஷிங்டனில் மங்கள உரை

அமெரிக்காவுக்கும் இலங்கைக்கும் இடையிலான நட்புறவு குறித்து வெளிவிவகார அமைச்சர் மங்கள சமரவீர வொஷிங்டனில் சிறப்பு விளக்கமளிக்கவுள்ளார்.
இந்த பேச்சுவார்த்தை எதிர்வரும் 12ம் திகதி வொஷிங்டனிலுள்ள தேசிய பத்திரிகை கழகத்தில் இடம்பெறவுள்ள வரவேற்பு நிகழ்விலேயே அமைச்சர் உரையாற்றவுள்ளார்.

மங்கள சமரவீர வெளிவிவகார அமைச்சராக பதவியேற்றதன் பின்னர் அமெரிக்காவுக்கு மேற்கொள்ளும் முதலாவது பயணம் இதுவாகும்.

மேலும் அமைச்சர் தனது விஜயத்தின் போது அமெரிக்க இராஜாங்க செயலாளரான ஜோன் கெரியுடன் தனது முதலாவது சந்திப்பை மேற்கொள்ளவுள்ளமை குறிப்பிடத்தக்கது.

கடந்த ஜனவரி மாதம் 8ம் திகதி நடைபெற்ற ஜனாதிபதி தேர்தலில் ஜனாதிபதி மைத்திரிபால சிறிசேன வெற்றி பெற்றதன் பின்னர் அமைச்சர் மங்கல சமரவீர வெளிவிவகார அமைச்சராக நியமிக்கப்பட்டார்.

அமைச்சரின் இவ்விஜயத்தின் போது எதிர்வரும் 11ம் திகதி சர்வதேச அமைதி குறித்தும் சிறப்புரையாற்றுவதற்கும் அவர் திட்டமிட்டுள்ளார்.

இதேவேளை அமெரிக்கா மற்றும் இலங்கை நாடுகளுக்கிடையிலான உறவுகள் மேலும் வலுப்படும் என தெற்கு மற்றும் மத்திய ஆசிய பிராந்திய விவகாரங்களுக்கான உதவி செயலாளர் நிஷா பிஸ்வால் தனது இலங்கை விஜயத்தின் போது தெரிவித்திருந்தமை குறிப்பிடத்தக்கது.