பிரதம நீதியரசர் நீதித்துறையின் கௌவரத்தை பாதுகாக்க வேண்டும்: நீதி சேவைகள் சங்கம்

ஜனாதிபதித் தேர்தல் நடைபெற்ற தினத்தில் அலரி மாளிகையில் இருந்தாக பிரதம நீதியரசர் மொஹான் பீரிஸ் ஒத்துக்கொண்டமை குறித்து ஆச்சரியமடைவதாக நீதி சேவைகள் சங்கம் வெளியிட்டுள்ள அறிக்கையில் தெரிவித்துள்ளது.
மொஹான் பீரிஸ், பிரதம நீதியரசர் என்ற பதவியின் கௌரவம் மற்றும் அதன் உயரிய பண்புகளை பாதுகாக்கும் வகையில் செயற்படுவார் என எதிர்பார்ப்பதாகவும் அதில் கூறப்பட்டுள்ளது.

நீதி சேவைகள் சங்கத்தில் நீதவான் மற்றும் மாவட்ட நீதிபதிகள் அங்கம் வகித்து வருகின்றனர்.

கடந்த 8 ஆம் திகதி தேர்தல் முடிவுகளை புறந்தள்ளி விட்டு முன்னாள் ஜனாதிபதியின் ஆட்சியை தொடர்வது குறித்து அலரி மாளிகையில் நடத்தப்பட்டதாக கூறப்படும் பேச்சுவார்த்தையில் பிரதம நீதியரசர் கலந்து கொண்டதாக குற்றப் புலனாய்வுத் திணைக்களத்தில் முறைப்பாடு செய்யப்பட்டுள்ளது.

முறைப்பாட்டின் பின்னர் ஆரம்பிக்கப்பட்ட விசாரணைகள் குறித்து நீதி சேவைகள் சங்கம் கடும் அதிருப்திய வெளியிடுவது என சங்கத்தின் நிறைவேற்று சபை ஏகமனதாக தீர்மானித்துள்ளது.

குற்றத்துடன் சம்பந்தப்பட்டமை தொடர்பான வாய்ப்புகள் எதுவாக இருந்தாலும் அலரி மாளிகையில் நடந்ததாக கூறப்படும் சதித்திட்டத்தின் போது பிரதம நீதியரசர் அங்கிருந்தமை தொடர்பில் சங்கம் ஆச்சரியமடைவதாகவும் அப்படியான முக்கியமான பிரச்சினைகளின் போது நீதித்துறை பக்கசார்பின்றி செயற்படுவது முக்கியமானது எனவும் கூறியுள்ளார்.

அப்படியான சந்தர்ப்பங்களில் அரசியல் மற்றும் நிறைவேற்று அதிகாரங்களின் தீர்மானங்களில் இருந்து விலகி இருக்க வேண்டும் என சங்கம் வலியுறுத்துவதாக அதன் செயலாளர் ரங்க திஸாநாயக்க வெளியிட்டுள்ள அறிக்கையில் தெரிவித்துள்ளார்.