ஜனாதிபதியின் சிரேஷ்ட ஆலோசகர் ஐ.நா மனித உரிமை ஆணையாளரை சந்திக்க உள்ளார்

ஐக்கிய நாடுகள் மனித உரிமை ஆணையாளர் செய்யத் ராத் செய்யத் அல் ஹூசைன் எதிர்வரும் மார்ச் மாதம் ஜெனிவா மனித உரிமை பேரவையில் வருடந்த அறிக்கையை தாக்கல் செய்ய உள்ளார்.
அதில் இலங்கையின் மனித உரிமைகள் தொடர்பான விவகாரங்களும் உள்ளக்கப்பட்டுள்ளன.

குறித்த அறிக்கையில் இலங்கையின் மனித உரிமை விசாரணைகள் தொடர்பான முன்னேற்றங்கள் பற்றி குறிப்பிடப்பட்டுள்ளதாக கூறப்படுகிறது.

கடந்த வருடம் ஜனவரி மாதம் முதல் டிசம்பர் மாதம் வரையான காலத்தில் நாட்டின் மனித உரிமை நிலைமைகள் மற்றும் ஐ.நா மனித உரிமை ஆணைக்குழுவின் பரிந்துரைகளை செயற்படுத்தி விதம் பற்றி அறிவிக்கையில் விபரிக்கப்பட உள்ளது.

இதனிடையே வெளிநாட்டு விவகாரங்கள் சம்பந்தமான ஜனாதிபதி மைத்திரிபால சிறிசேனவின் சிரேஷ்ட ஆலோசகர் கலாநிதி ஜயந்த தனபால ஜெனிவா மனித உரிமை ஆணையாளரை சந்திக்க உள்ளார்.

மனித உரிமை ஆணைக்குழு இலங்கை தொடர்பாக நடத்தும் விசாரணைகள் தொடர்பான கருத்துக்களை ஆணையாளருடன் தனபால பரிமாறிக்கொள்ள உள்ளதாக தெரியவருகிறது.