சுனந்தா கொலை வழக்கு: மாயமான தடயங்கள்….அதிர்ச்சி தகவல்

சுனந்தா கொல்லப்பட்ட ஹொட்டல் அறையில் இருந்த சில தடயங்கள் மாயமாகி உள்ளது பரபரப்பை ஏற்படுத்தியுள்ளது.
சசிதரூரின் மனைவி சுனந்தா புஷ்கர் கடந்த ஆண்டு ஜனவரி 17ம் திகதி டெல்லியில் அவர் தங்கியிருந்த ஹொட்டல் அறையில் மர்மமான முறையில் இறந்து கிடந்தார்.

கட்டாயப்படுத்தி விஷம் கொடுக்கப்பட்டதால் சுனந்தா இறந்ததாக எய்ம்ஸ் மருத்துவமனை பிரேத பரிசோதனை அறிக்கை தெரிவித்து இருந்தது.

இதனைத் தொடர்ந்து ஒரு வருடத்துக்கு பின்னர் கடந்த 1ம் திகதி டெல்லி பொலிசார் சுனந்தா வழக்கை கொலை வழக்காகப் பதிவு செய்தனர்.

இந்த வழக்கை விசாரிக்க சிறப்பு புலனாய்வுக்குழுவும் அமைக்கப்பட்டு விசாரணை நடந்து வருகிறது.

இந்த கொலை தொடர்பாக கடந்த 19ம் திகதி டெல்லியில் உள்ள வசந்த் விஹார் காவல் நிலையத்தில் சசிதரூரிடம் விசாரணை நடத்தப்பட்டது.

சிறப்பு புலனாய்வுக்குழு பொலிசார், சுனந்தா கொல்லப்பட்ட ஹொட்டல் அறையிலும் சோதனை நடத்தினர். இதில் சில அதிர்ச்சி தகவல்கள் கிடைத்தன.

சுனந்தா கொல்லப்பட்ட அன்று அந்த ஹொட்டல் அறையில் இருந்த அவரது உடைகள், ஷூக்கள் உள்பட பொருட்கள் காணாமல் போயிருந்தது தெரியவந்தது.

இவை அனைத்தும் அவரது மரண செய்தி வெளியான பின்னரே அப்புறப்படுத்தப்பட்டு உள்ளதாக பொலிசார் கூறியுள்ளனர்.