நூறு நாள் திட்டத்தில் கிரிக்கெட் விளையாட்டுக்கு முன்னுரிமை அளிக்கப்படும்: நவீன் திஸாநாயக்க

நூறு நாள் செயற் திட்டத்தில் கிரிக்கெட் விளையாட்டுக்கு கூடுதல் முன்னுரிமை அளிக்கப்படும் என விளையாட்டுத்துறை மற்றும் சுற்றுலாத்துறை அமைச்சர் நவீன் திஸாநாயக்க தெரிவித்துள்ளார்.
விளையாட்டுத்துறை அமைச்சில் இன்று கடமைகளைப் பொறுப்பேற்றுக்கொண்ட போது அவர் இதனைத் தெரிவித்துள்ளார்.

எதிர்வரும் மாதம் ஆரம்பமாகவுள்ள உலகக் கிண்ண கிரிக்கெட் போட்டி குறித்து கூடுதல் கவனம் செலுத்தப்படும்.

கிரிக்கெட் சபையின் அதிகாரிகள், கிரிக்கெட் விளையாட்டுத்துறை தொடர்பில் மட்டும் தங்களது கவனத்தை செலுத்த வேண்டும். அவ்வாறு செய்யாத அதிகாரிகளுக்கு எதிராக அடுத்த கட்ட நடவடிக்கை எடுக்கப்படும் என நவீன் திஸாநாயக்க தெரிவித்துள்ளார்.

இலங்கைக்கு டெஸ்ட் கிரிக்கெட் அந்தஸ்தை பெற்றுக்கொடுப்பதில் நவீன் திஸாநாயக்கவின் தந்தை காமினி திஸாநாயக்க மிக முக்கியமான பங்காற்றியுள்ளார் என்பது குறிப்பிடத்கத்கது.

காமினி திஸாநாயக்க இலங்கை கிரிக்கெட் கட்டுப்பாட்டுச் சபையின் தலைவராகவும் கடமையாற்றியுள்ளார்.