மெஹர் தரருக்கும், உங்களுக்கும் என்ன தொடர்பு? சசி தரூரிடம் பொலிஸார் விசாரணை

சசி தரூரிடம் சுனந்தா புஷ்கர் மரணம் தொடர்பான விசாரணையில், பாகிஸ்தான் பத்திரிகையாளர் மெஹர் தரருடன் உள்ள தொடர்பு பற்றி பொலிசார் விசாரித்துள்ளனர்.
டெல்லியில் உள்ள சிறப்பு புலனாய்வுக் குழு அலுவலகத்தில் வைத்து, முன்னாள் மத்திய அமைச்சரான சசி தரூரிடம் சுனந்தா புஷ்கர் மரணம் தொடர்பான விசாரணை நடந்துள்ளது.

இந்நிலையில் சுனந்தா விஷம் கொடுத்து கொள்ளப்பட்டு இருக்கலாம் என டெல்லி பொலிசார் வழக்கு பதிவு செய்த மூன்று வாரங்களுக்கு பின் சசிதரூரிடம் விசாரணை நடத்தப்பட்டது பரபரப்பை ஏற்படுத்தியுள்ளது.

சுனந்தாவின் உடல் உறுப்புகளை வெளிநாட்டிற்கு பரிசோதனை செய்ய அனுப்ப முடிவு செய்த பொலிசார், இந்த கொலை தொடர்பாக, சசிதரூரின் உதவியாளர் மற்றும் வீட்டு பணிப்பெண்ணிடம் விசாரணை மேற்கொண்டனர்.

சசிதரூரிடம் நடத்திய விசாரணையில், சுனந்தா இறந்த 2014ம் ஆண்டு ஜனவரி 17ம் திகதி என்ன நடந்தது? பாகிஸ்தான் பத்திரிகையாளர் மெஹர் தரருடன் உள்ள தொடர்பு என்ன? சுனந்தாவின் உடல்நிலை, அவர் எவ்வித நோயால் அவதிப்பட்டு கொண்டிருந்தார்? போன்ற பல கேள்விகள் கேட்கப்பட்டுள்ளன.

மேலும், இறப்பதற்கு முன் சுனந்தாவுடன் பேசிய பத்திரிகையாளர்களிடமும் பொலிசார் விசாரணை நடத்தவுள்ளதாக செய்திகள் வெளியாகியுள்ளன.