வவுனியா வர்த்தகரை கடத்தி கப்பம் பெற்ற இருவர் கைது

வவுனியா பிரதேசத்தில் வர்த்தகர் ஒருவரை கடத்திச் சென்று கப்பமாக 10 லட்சம் ரூபாவுக்கான காசோலைகளை பலவந்தமாக எழுதி கொண்டதாக கூறப்படும் இரண்டு சந்தேக நபர்களை பொலிஸார் கைது செய்துள்ளனர்.
இவர்கள் வவுனியா நகரில் கைது செய்யப்பட்டதாக வவுனியா பொலிஸார் தெரிவித்துள்ளனர்.

ஆடைகளை இறக்குமதி செய்து விற்பனை செய்யும் 60 வயதான நாகேந்திரன் ஜெயராஜ் என்ற வர்த்தகரிடம் ஆடைகளை கொள்வனவு செய்வது போல் பணத்தை பெற இவர்கள் முயற்சித்துள்ளனர். இந்த முயற்சி தோல்வியடைந்ததை அடுத்து வர்த்தகரை சந்தேக நபர்கள் கடத்திச் சென்றுள்ளனர்.

வர்த்தகரின் வாயில் கல்லை வைத்து அடைத்து, கை, கால்களை கட்டி அச்சுறுத்தி, கசோலைகளில் கையெழுத்துக்களை பெற்ற பின்னர், வர்த்தகரை விடுவித்துள்ளனர்.

இது குறித்து வர்த்தகர் பொலிஸில் முறைப்பாடு செய்துள்ளார்.

கடத்தலுக்கு பயன்படுத்தப்பட்ட வேனுடன் மற்றுமொரு சந்தேக நபர் கொழும்புக்கு தப்பியோடியுள்ளார். அவரை கைது செய்ய பொலிஸார் விசாரணைகளை ஆரம்பித்துள்ளன.