இந்தியாவை ஆளில்லாத விமானங்கள் மூலம் தாக்க பயங்கரவாதிகள் திட்டம்!

இந்தியா மீது ஆளில்லாத விமானங்கள் மூலம் பயங்கரவாதிகள் தாக்குதல் நடத்தும் அபாயம் இருப்பதாக மக்களவையில் மத்திய உள்துறை இணையமைச்சர் ஹரிபாய் பாரதிபாய் செளதரி தெரிவித்தார்.
பயங்கரவாதத்துக்கு எதிரான கூட்டு நடவடிக்கைக் குழுவில் இந்தியாவும் இடம் பெற்றுள்ளது.

இதன் மூலம், பயங்கரவாதிகளின் நடவடிக்கைகள், அந்த இயக்கங்களின் செயல்பாடுகள் குறித்து நமது உளவு அமைப்புகள் சேகரிக்கும் தகவல்கள் சீனா உள்பட 24 நாடுகளுடன் பகிர்ந்து கொள்ளப்படுகிறது.

இந்த கூட்டு நடவடிக்கைக் குழு உறுப்பு நாடுகள் அவ்வப்போது சந்திப்புகளை நடத்தி தங்களுக்கு கிடைக்கும் தகவல்கள், பயங்கரவாதத்துக்கு எதிராக எடுக்கும் நடவடிக்கைகள் உள்ளிட்டவற்றை பகிர்ந்து கொள்கின்றன. அனைத்து நாடுகளின் நலன் கருதி இதனை செய்து வருகிறோம்.

ஆளில்லாத விமானங்கள் உள்ளிட்டவை மூலம் பயங்கரவாதிகள் தாக்குதல் நடத்தலாம் என்றும், இதற்காக அவர்கள் முயன்று வருவதாகவும் உளவுத் துறை தகவல்கள் நமக்குக் கிடைத்துள்ளன. இத்தாக்குதல் முறை மிகவும் அபாயகரமானது என அமைச்சர் செளதரி தெரிவித்துள்ளார்.

மக்களவையில் நேற்று எழுப்பப்பட்ட கேள்வி ஒன்றுக்கு பதிலளித்து அவர் உரையாற்றினார்.