நாட்டை பிளவுபடுத்தும் நிபந்தனைகளினால் என்னை அடிமைப்படுத்த முடியாது: ஜனாதிபதி

நாட்டை பிளவுபடுத்தும் நிபந்தனைகளினால் என்னை அடிமைப்படுத்த முடியாது என ஜனாதிபதி மஹிந்த ராஜபக்ச தெரிவித்துள்ளார்.
அலரி மாளிகையில் நேற்று நடைபெற்ற நிகழ்வு ஒன்றில் அவர் இதனைக் குறிப்பிட்டுள்ளார். நாட்டை பிளவுபடுத்தக் கூடாது என்ற எனது கடுமையான நிலைப்பாட்டின் காரணமாகவே தமிழ்த் தேசியக் கூட்டமைப்பும் ஸ்ரீலங்கா முஸ்லிம் காங்கிரஸும் எனக்கு எதிராக செயற்படுகின்றன.

புலிகள் பயங்கரவாதத்தின் ஊடாக நாட்டை பிளவுபடுத்த முயற்சித்தனர். அதற்கு நான் இடமளிக்கவில்லை. நாட்டின் பௌதீக ஒருமைப்பாட்டையோ இறைமையையும் சிதைக்கும் எந்தவொரு விடயத்திற்கும் ஆதரளிக்கப் போவதில்லை.

வடக்குப் பிரச்சினைக்கு தீர்வு காண நாடாளுமன்றத் தெரிவுக்குழுவில் அங்கம் வகித்து கூட்டாக இணைந்து தீர்வுத் திட்டமொன்றை எட்ட முடியும் என்ற நிலையில் தமிழ்த் தேசியக் கூட்டமைப்பு வேறும் திசையில் பயணிக்க முயற்சிக்கின்றது.