கலைஞர்கள் மீது தாக்குதல் நடத்தியவர்கள் அடையாளம் காணப்பட்டுள்ளனர்!

கலைஞர்கள் மீது தாக்குதல் நடத்தியவர்கள் அடையாளம் காணப்பட்டுள்ளதாக பொலிஸ் ஊடகப் பேச்சாளர் அஜித் ரோஹன தெரிவித்துள்ளார்.
குருணாகல் கும்புக்கெட்ட என்னும் இடத்தில் வைத்து நேற்று கலைஞர்கள் மீது தாக்குதல் நடத்தப்பட்டிருந்தது. பொதுவேட்பாளர் மைத்திரிபால சிறிசேனவிற்கு ஆதரவாக பிரச்சாரத்தில் ஈடுபட்டிருந்த இளம் கலைஞர்கள் மீது தாக்குதல் நடத்தப்பட்டிருந்தது.

புதிய தலைமுறைக் கலைஞர்கள் என்ற அமைப்பின் கலைஞர்கள் தாக்கப்பட்டிருந்தனர். பிரபல இளம் நடிகை சமனலி பொன்சேகா, இந்திரசாபா மனுவீர,லக்ஸ்மன் செனவிரட்ன உள்ளிட்ட கலைஞர்கள் தாக்கப்பட்டிருந்தனர்.

தாக்குதலுடன் தொடர்புடைய நபர்கள் அடையாளம் காணப்பட்டுள்ளதாக பொலிஸ் ஊடகப் பேச்சாளர் தெரிவித்துள்ளார். இந்த சந்தேக நபர்கள் விரைவில் கைது செய்யப்படுவார்கள் என அவர் இன்று ஊடகங்களுக்கு தெரிவித்துள்ளார்.

அண்மைக்காலமாக கலைஞர்கள் மீது தாக்குதல் நடத்தப்பட்டு வருவதாகவும் நாகரீகமான சமூகக் கட்டமைப்பு ஒன்றில் இவ்வாறு கலைஞர்கள் மீது மிலேச்சத்தனமான தாக்குதல்கள் நடத்தப்பட மாட்டாது எனவும் கலைஞர்கள் தெரிவித்துள்ளனர்.