காணாமல் போன பொலிஸ் உத்தியோகத்தர் தொடர்பில் அறிக்கை கோரும் ஜனாதிபதி

வவுனியாவில் வைத்து காணாமல் போயுள்ள பொலிஸ் உத்தியோகத்தர் தொடர்பில் விசாரணை அறிக்கையொன்றை சமர்ப்பிக்குமாறு பொலிஸ் மா அதிபருக்கு ஜனாதிபதி உத்தரவிட்டுள்ளார்.
வவுனியா பிரதிப் பொலிஸ் மா அதிபர் அலுவலகத்தின் கீழ் செயற்படும் விசேட விசாரணைப் பிரிவின் சார்ஜண்ட் தர பொலிஸ் உத்தியோகத்தர் ஒருவர் கடந்த ஆகஸ்ட் மாதம் 07ம் திகதி தொடக்கம் காணாமல் போயுள்ளார்.

ஆகஸ்ட் 07ம் திகதியன்று லீவு பெற்றுக் கொண்டு வீடு செல்வதற்காக புறப்பட்டுச் சென்ற குறித்த பொலிஸ் உத்தியோகத்தர் அதன் பின் கடமைக்குத் திரும்பவில்லை. அத்துடன் தனது வீட்டுக்கும் சென்றிருக்கவில்லை. இடையில் மர்மமான முறையில் காணாமல் போயுள்ளார்.

இதுதொடர்பாக ஜனாதிபதியின் கவனத்துக்கு பொலிஸ் உத்தியோகத்தர்களின் குடும்பத்தினர் முறைப்பாடு ஒன்றை அனுப்பியுள்ளனர்.

இதனையடுத்து குறித்த பொலிஸ் உத்தியோகத்தர் காணாமல் போன சம்பவம் தொடர்பில் முழுமையான விசாரணையொன்றை நடத்தி அறிக்கையொன்றை சமர்ப்பிக்குமாறு ஜனாதிபதி மைத்திரிபால சிறிசேன பொலிஸ் மா அதிபருக்கு உத்தரவிட்டுள்ளார்.