பசு கொல்லப்பட்டதாக எழுந்த புரளி: உ.பி-யில் மீண்டும் கலவரச் சூழல்

உ.பி-யில் பசு கொல்லப்பட்டதாக எழுந்த புரளியால் மீண்டும் கலவரச் சூழல் நிலவுகிறது.
ஆக்ரா அருகில் உள்ள மைன்புரி மாவட்டம் நகாரியா கிராமம் அருகே வயல்வெளியில் மேய்ந்து கொண்டு இருந்த பசு மாட்டை 4 பேர் பிடித்துச் சென்று அருகில் உள்ள வீட்டில் வைத்து வதை செய்து கொன்றதாக தகவல் பரவியது.

இதையடுத்து அந்த வீட்டை சுற்றி வளைத்த கிராம மக்கள், அங்கு தோல் உரிக்கப்பட்ட நிலையில் பசுவின் உடல் கிடந்ததை பார்த்துள்ளனர்.

அப்போது அங்கிருந்து ஓட்டம் பிடித்த 4 பேரில் 2 பேரை விரட்டிப் பிடித்தனர். 2 பேர் தப்பி விட்டனர்.

இந்த தகவலால் நகாரியா மற்றும் மைன்புரியில் கலவரம் ஏற்பட்டதை அடுத்து, சிலர் கும்பலாக சென்று கடைகளுக்கு தீவைத்தனர்.

தகவலறிந்து சம்பவ இடத்துக்கு பொலிசார் சென்றபோது நடந்த கல்வீச்சில் 7 பொலிசார் காயம் அடைந்தனர்.

பின்னர் பொலிசார் கண்ணீர் புகை குண்டுகளை வீசி கூட்டத்தை கலைத்தனர்.

பொலிசார் நடத்திய விசாரணையில் பசுவின் உரிமையாளர் கேட்டுக் கொண்டதன் பேரிலேயே 4 பேரும் பசுவை கொன்று தோலை உரித்துக் கொண்டு இருந்தது தெரிய வந்தது.

மேலும், கல்வீச்சு, தீ வைப்பு தொடர்பாக 2 பேர் கைது செய்யப்பட்டுள்ள நிலையில் மேலும் பலர் கைது செய்யப்படலாம் என்று கூறப்படுகிறது.