மூதூர் விபத்தில் ஒருவர் மரணம்- கடந்த ஒன்பது மாதங்களில் வாகன விபத்தில் 2171 பலி

by oviya Fri Oct 09, 2015 2:11 pm

மூதூர் - கிண்ணியா வீதியில் மணல் ஏற்றிச் சென்ற உழவு இயந்திரம் ஒன்று சாரதியின் கட்டுப்பாட்டை இழந்து வீதியை விட்டு விலகி மரம் ஒன்றில் மோதியதில் ஒருவர் உயிரிழந்துள்ளார்.
சம்பவத்தில் சாரதியும் மற்றும் நபரும் காயமடைந்து மூதூர் வைத்தியசாலையில் அனுமதிக்கப்பட்ட நிலையில், சிகிச்சை பலனின்றி சாரதி உயிரிழந்தார்.
38 வயதான மரியதாஸ் சகாயராஜா என்பவரே சம்பவத்தில் உயிரிழந்துள்ளார்.
மரண விசாரணைகள் இன்று நடைபெற்றது. சம்பவத்தில் காயமடைந்த மற்றைய நபர் மூதூர் வைத்தியசாலையில் சிகிச்சை பெற்று வருகிறார்.
சம்பவம் குறித்து மூதூர் காவற்துறையினர் விசாரணைகளை நடத்தி வருகின்றனர்.
கடந்த ஒன்பது மாதங்களில் வாகன விபத்தில் 2171 பலி! அதிர்ச்சி தகவல்!
2015 ம் ஆண்டின் முதல் 9 மாதங்களில் இடம்பெற்ற 2 ஆயிரத்து ஏழு வீதி விபத்துகளில் 2 ஆயிரத்து 171 பேர் பலியாகியுள்ளனர் என காவல்துறையினர் தெரிவித்துள்ளனர்.
இவற்றில், வீதி விபத்துகளில் 614 சாரதிகள், 404 பயணிகள் மற்றும் 206 பாதசாரிகளும் பலியானதாக காவல்துறையினர் குறிப்பிட்டுள்ளனர்.
அத்துடன், கடந்த 2014 ஆம் ஆண்டு காலப்பகுதியில் இடம்பெற்ற வீதி விபத்துகளில், ஆயிரத்து 695 விபத்துகள் இடம்பெற்ற நிலையில், ஆயிரத்து 822 பேர் பலியாகினர்.
இந்நிலையில் கடந்த வருடத்துடன் ஒப்பிட்டு பார்க்கையில், விபத்துக்களின் எண்ணிக்கை அதிகரித்துள்ளமை குறிப்பிடத்தக்கது.