புதிய இலஞ்ச, ஊழல் ஆணைக்குழுவை நியமிக்குமாறு கோரிக்கை

முடங்கிப் போயுள்ள இலஞ்ச, ஊழல் ஆணைக்குழுவை உடனடியாக கலைத்துவிட்டு இலஞ்சம் மற்றும் ஊழலை ஒழிக்க புதிய நிறுவனம் ஒன்றை ஸ்தாபிக்குமாறு பிரதமர் ரணில் விக்ரமசிங்கவிடம் கோரிக்கை விடுக்கப்பட்டுள்ளது.
ஐக்கிய தேசியக் கட்சியின் நாடாளுமன்ற உறுப்பினர்கள் இந்த கோரிக்கையை விடுத்துள்ளனர்.

பணிகள் மேற்கொள்ளப்படாத காரணத்தினால், முடங்கி போயுள்ள இலஞ்ச, ஊழல் ஆணைக்குழுவை உடனடியாக கலைத்து விட்டு ஐக்கிய நாடுகளின் ஊழல் எதிர்ப்பு இணக்கப்பாடுகளை சட்டமாக்கி, ஊழலை ஒழிக்க புதிய நிறுவனம் ஸ்தாபிக்கப்பட வேண்டும் எனவும் அவர்கள் தெரிவித்துள்ளனர்.

ஜனவரி 8 ஆம் திகதி பதவியேற்ற புதிய அரசாங்கம் இலஞ்ச, ஊழல் ஆணைக்குழுவிற்கு 50 அதிகாரிகளை நியமித்தது. எனினும் ஆணைக்குழு அந்த அதிகாரிகளை காவற்துறை நிலையங்களுக்கு மீண்டும் திருப்பி அனுப்பியுள்ளதாக முன்னாள் அமைச்சர் ஜோன் அமரதுங்க தெரிவித்துள்ளார்.

ஆணைக்குழு விசாரணைகள் எதனையும் நடத்தாத போதிலும் ஆணையாளர்கள் உட்பட அதன் ஊழியர்கள் ஊதியம் உட்பட சகல சிறப்புரிமைகளை பெற்று வருவதாகவும் ஐக்கிய தேசியக் கட்சியின் நாடாளுமன்ற உறுப்பினர்கள் தெரிவித்துள்ளனர்.