நாட்டிற்குள் 10 ஆயிரம் கிலோ ஹெரோயின் பதுக்கி வைப்பு: ஆபத்தான ஔடதங்களை கட்டுப்படுத்தும் தேசிய சபை

10 ஆயிரம் கிலோ கிராமுக்கும் மேற்பட்ட ஹெரோயின் போதைப் பொருள் நாட்டிற்குள் மறைத்து வைக்கப்பட்டுள்ளதாக ஆபத்தான ஔடதங்களை கட்டுப்படுத்தும் தேசிய சபை தெரிவித்துள்ளது.
வருடாந்தம் நாட்டிற்குள் சுமார் ஆயிரம் கிலோ கிராம் ஹெரோயின் போதைப் பொருள் பயன்படுத்தப்படுகிறது என அதன் தலைவர் மருத்துவர் திலங்க சமரசிங்க குறிப்பிட்டுள்ளார்.

சிறியளவில் போதைப் பொருளுக்கு அடிமையானவர்கள் மற்றும் வியாபாரிகளிடம் பெற்றுக்கொண்ட தகவல்களுக்கு அமைய இந்தப் போதைப் பொருள் வியாபாரத்தில் சம்பந்தப்பட்ட அரசியல்வாதிகளின் பட்டியல் இருப்பதாக வெளியிட்ட தகவல் காரணமாக தனக்கு உயிராபத்து இருப்பதாகவும் சமரசிங்க குறிப்பிட்டுள்ளார்.

இதனடிப்படையில், ஜனாதிபதியின் உத்தரவின் பேரில் கடந்த வியாழக்கிழமை இரவு முதல் நேற்று மதியம் வரை தனக்கு அதிரடிப்படையினரின் பாதுகாப்பு வழங்கப்பட்டிருந்தது எனவும் தற்போது இரண்டு அதிரடிப்படையினர் தனக்கு பாதுகாப்பு வழங்கி வருவதாகவும் சமரசிங்க மேலும் தெரிவித்துள்ளார்.